今年初放了半年假的「軒公」張敬軒（Hins）終於回歸，日前他現身新城廣播隨即引發黃埔船景街一陣哄動！今次張敬軒不僅帶來新歌〈放棄的界限〉，還跟「新城八大家」小編即場玩了一次「快問快答」，在5條刁鑽的選擇題中，讓他在「不想放棄」的清單中二選一，到底在「音樂」與「愛情」之間，他會如何抉擇？在「堅持」與「學識放手」一題更一度難倒他呢！
不愧為最強「反差萌」 既幽默又坦率
訪問由五道關於取捨的選擇題拉開序幕。當「軒公」被問到音樂與愛情二選一最不想放棄甚麼時，他鬼馬地答：「音樂……因為揀愛情好難解釋……哈哈！」其後他補充：「我覺得愛情都緊要嘅，如果有的話！」但不竟音樂對於他而言，是近乎說話的一種情緒表達方式，所以他還是選了音樂。
談到「創作初心」與「觀眾期望」之選，他認為兩者就像裙帶關係，但順序至關重要：「因為觀眾嘅期望會基於我創作嘅初心，要先有創作初心，所以係唔可以放棄創作嘅初心。」
精彩經歷終歸會平淡 簡單生活才最開心
而終日沉浸於這個花花世界中的娛樂圈，面對「獨處」與「陪伴他人」的選擇，他毫不猶豫地說：「我唔可以放棄獨處嘅時間，我覺得人好似一舊 powerbank（充電器）咁，你要叉滿咗自己，同 take care 好自己，先至可以照顧到其他人，所以我覺得先畀咗自己獨處時間。」
至於面對「簡單生活」與「精彩經歷」，他選擇了前者：「唔可以放棄簡單生活，我覺得精彩經歷，終於有一日都會歸於平淡嘅，簡單生活係令到自己開心嘅一種方式嚟。」
學識放手 是人生一大課題
而當被問到「堅持」與「學識放手」的抉擇時，他沉吟了一會：「嗯……呢個有啲深度！如果真係要我揀呢，我會揀唔可以放棄學識放手。」他直言，放手是人生一大課題，從日常生活「衫褲鞋襪」的斷捨離，到不同人生階段對性格執念的轉變，「後生嘅時候可能令自己成功嘅原因，但去到某個年紀時，我又唔覺得要放棄，但要轉變，要 upgrade 自己。」
軒公大爆新歌曲風格 試試未唱過的「小甜歌」
經過一輪快問快答，重回新歌〈放棄的界限〉的主題，「軒公」收起輕鬆的語調，認真剖析創作背後的核心：「其實呢首歌係由一個已讀不回嘅關係，甚至對方已經放棄咗，但由於自己仲堅持，繼續苦苦沉淪喺個堅持入面嘅痛苦，或者內耗嘅過程。」
他希望透過歌曲告訴歌迷：「放手係好難嘅，但有時學識放手係一種同自己嘅和解，同埋去寬恕自己，甚至去愛錫自己嘅方法。」他更寄語聽眾：「無論遇到感情又好、工作又好、乜嘢關係都好，當真係要放手嘅時候，就畀一個界限自己，仲有一個機會攞得返自己嘅尊嚴。」
訪問尾聲，談及未來的新動向，張敬軒透露下半年將會相當活躍，不但會繼續發布新歌，在音樂風格上亦作出一些新嘗試：「會有啲 band sound嘅音樂，亦都有啲我以前未唱過嘅小甜歌，一啲 sweet 嘅 R&B。」粉絲們敬請期待喇！
圖片來源：新城廣播
