現年38歲的陳庭欣（Toby）日前到新城廣播接受訪問，大談自己近年愛上的新運動Pickleball（匹克球），她形容這是人生一個新的嘗試與轉捩點，認為這項運動有一種「魔性」，能吸引不同界別、不同年齡層的人：「運動係開心、正面嘅，令我哋釋放好多愉快嘅能量。打呢個球賽除咗強身健體，其實都係一種好好嘅的社交。」
Toby透過這項運動，認識了更多圈內人，甚至打破了電視台之間的界限：「除咗我哋TVB之外，我哋可能同友台嘅朋友都熟咗。」她更試過以「運動員」身份出外工作：「我上次以運動員身份，同關楚耀去咗北京打一個國際性嘅賽事，當然我哋係明星表演賽。」
而意想不到的藝人都有參與這項運動：「我見鍾嘉欣都有玩呢個運動，佢同ViuTV嘅肥仔（梁業）都有一齊玩，有啲人你唔會諗到佢會玩呢個遊戲，但佢哋都會玩。」被問到會否組織明星隊？Toby表示：「已經有人開始做明星隊，但我負責唔到呢個統籌，因為都要好多時間或某一種能力，但如果佢哋好有興趣或者邀請我去，我都盡量會去。」
問她有否從中認識合眼緣的男士？Toby坦言：「好多男女都有玩呢個遊戲，我做運動就真係做運動，認識多啲朋友，唔同界別嘅人，自己做老闆嘅有，打工仔都有，好開心。」
至於對運動型男士會否加分？她笑言：「會加分，因為大家會有共同話題，一齊做鍾意嘅事，如果將來有緣分認識到一個唔鍾意運動嘅，咁可能都冇問題，但我都會嘗試引領吓佢。」
期間，Toby自爆「金牌媒人」林盛斌（Bob）十分熱心為她牽紅線：「Bob爺公開話要幫我去搵另一半，佢話自己咩都唔做，其實佢有好多嘢做，又開劇、又電影，但佢好努力介紹人畀我。」可惜目前效果未如理想：「佢介咗咗兩個，其中一個我有見過面，喺工作上見過，但佢唔做運動嘅，我有同佢傾過偈，真係冇諗到。」
雖然如此，Toby對Bob的心意非常感激：「佢喺頒獎台上講咗一番話，我好感謝佢，佢真係一個top sales，好努力。」她更笑言Bob已變成她的「爸爸」：「佢喺咁忙嘅時間入面，成日發訊息問我『點樣呀？你同人見咗面未？有冇傾偈？你唔好成日打波，你嘅終身大事，打少兩個鐘球』，佢變咗我阿爸，好搞笑。」
圖片：新城廣播
