藝人胡渭康（William）昨天（29日）到新城廣播接受譚玉瑛（阿譚）、何基佑及麥皓兒主持的《QK玉瑛室》訪問，大談當年參加完第一屆新秀歌唱大賽後，首個主持的就是兒童節目《430穿梭機》，阿譚笑指：「你當年咁虛榮要做明星？」William澄清：「唔係虛榮，我嗰時成日參加歌唱比賽，一星期出去比賽兩三日。」
問William比賽完即被調入兒童節目可有失望？他表示：「我嗰時只有15歲，點會識得失望？可以上電視，又可以同阿譚做兒童節目，我就係咁認識阿譚。」阿譚揚言當年跟William相當投契，William即表示：「可能我細個，你母性又好。」他指當年自己只是小朋友，對電視台每樣事物都感到很新奇，令他大開眼界，William笑稱：「不過我成日畀人笑，生得牛高馬大，明明係細路，但我嘅動靜同身高唔匹配。」
之後William與林利和蔣慶龍組成小虎隊，並獻唱多首經典歌，包括《忍著淚說Goodbye》及《伴我啟航》等，何基佑即表示：「我四歲就成日聽你唱歌，好深刻，《忍著淚說Goodbye》我日日聽，嗰時覺得呢班哥哥好勁，首歌好好聽。」William亦一臉自豪：「以我所知《伴我啟航》到今日警隊步操都有用，因為好代表到嗰種精神。」
圖片：新城廣播
