Threads大流行後，不少藝人都會以真身上水回應網友，令社交平台火花處處。早前麥美恩（Mayanne）出Post寫道：「風都吹得起，食多啲嘢啦，唔該！」即時觸動了被指暴瘦變成紙片人的方皓玟（小明），不甘被攻擊的小明更以「白卡論」在網上回應，暗指有人不懂尊重別人。
「今日係白卡嘅世界，我只不過係一張黑卡啫，大家又何必咁介懷去分析一個人究竟係咪如你所想所希望咁生存呢？冇必要。你過你嘅人生我過我嘅人生。呢個世界就係咁光怪陸離，每日都有花生睇。覺得我啱睇嘅多謝大家支持，唔啱睇嘅就咪睇。留言都嫌你嘥自己時間。歡迎大家發表討論嘅同時，要懂得尊重，因為喺自由嘅世界裏面，懂得尊重已經唔係一個common sense。」
以為一場Threads風波就此完結？日前Mayanne現身活動，被傳媒追問是否會跟小明做朋友，她向記者坦白已拒絕對方，表示自己怕醜，被小明嚇親，自認表面熱情，笑言要再問問好友許文軒意見，因為對方跟小明比較熟。
被Mayanne派檸檬的小明，當然不甘以弱，接連在IG及Threads出post，有聲音檔又有文字，叫麥美恩唔駛驚同唔駛太認真：「有記者朋友send咗麥美恩嘅訪問畀我，其實你真係唔駛驚喎，我睇到依家仲驚過你呀，邀請你做朋友好明顯係講笑㗎咋，傻豬唔好咁認真啦，只係當日Cam man哥哥遞咗你個threads post俾我，我即時貪玩留咗個言，事後基於禮貌所以邀請你做朋友，唔駛驚唔駛驚，我唔怕食檸檬㗎，做人唔使太認真嘅。做朋友都要講緣份嘅。」打長文都未夠，還要上載她本尊開金口清唱《搖籃曲》的影片，「小寶寶，食蛋糕，飯仔mum mum叔叔餵到……」又補上發文寫道「定經（驚）啊」、「做朋友嘅嘢」，看來今次真的觸動了小明神驚。
Mayanne暫未有為此事在社交平台再發文，至於在方皓玟平台那邊，網友繼續食花生，留言表示「小朋友係細膽啲」、「我又驚驚但又想同小明做朋友，咁點算呀，好苦惱呀！」、「她以為自己是誰」，小明的follower傾向抨擊Mayanne，事件會否隨《搖籃曲》劃上句號？拭目以待。
圖片：IG@charmainefong、mayannem
