「最強CV」唱作女新人蘇詠淳（Vincy）繼出道作〈踏空氣的人〉後，近日帶來童話系列第二章〈沉進海的星〉。新歌延續其親自創作路線，由 Vincy 與 Ivy Hung 共同作曲，更獲星級班底加持，邀得周耀輝填詞，蘇道哲及 Brian Yip 編曲並由蘇道哲監製。Vincy今次作品以「在大海裏尋找星星」傳說為藍本， 藉此向樂迷傳遞正能量：「每一個人都係一粒星星。」
向外尋找總會忘記內心 盼聽眾「用最喜歡嘅樣子發光」
談到歌曲想傳達的訊息，Vincy 認為人往往忙於向外追尋，卻忘了回望內心：「好多時，我哋都會喺呢個世界周圍搵啲唔屬於自己嘅東西，好似搵星星一樣，但一直向外搵，就會唔記得望返自己嘅內心。」她相信每個人內在都有閃耀的部分，希望藉這首歌提醒大家把目光收回自身：「好希望透過呢一首歌同大家講，我哋每一個人都係一粒星星，只係可能你自己未發現。」
至於如何發光，Vincy 認為沒有標準答案，更建議樂迷不妨一邊聽歌一邊望海：「發光可以有好多種方式，因為每個人發光嘅模樣都唔同。希望大家聽呢首歌嘅時候，都可以想像自己用最喜歡嘅樣子發光。」
與 Ivy Hung 一拍即合 碰撞出「一浪接一浪」的旋律
〈沉進海的星〉由 Vincy 與 Ivy Hung 共同作曲，Vincy 透露二人寫著寫著才發現彼此都十分喜愛大海，默契亦由此而來：「我 feel 到佢彈琴嗰陣都好似有一片片海浪嘅感覺，然後我又會喺佢彈嘅 melody 上面 on top 哼一啲旋律，發現我哋對海嘅想像都好似，然後碰撞到一浪接一浪嘅 melody。」她創作時腦海中的畫面，是一個人飄在海面上閃閃發光，這個畫面在亦成為整首歌的核心意象。
從「要光」到「有光」周耀輝歌詞寫盡自我探索
Vincy 透露，最初只向周耀輝老師簡單說了故事設定：一個在海裡找不到星星而自我質疑的女孩，直到故事最後才發現自己可以變成一粒星星。收到歌詞後，Vincy 坦言「睇到起雞皮」，她特別喜歡其中一句「要光會有光有光 原來是我」：「我覺得『要光』係一個願望，『會有光』係發現嘅過程，『有光』就係發現咗，短短一句包含咗自我探索嘅過程。」她更大讚：「成份詞寫得好浪漫，同時昇華咗我對呢首歌嘅想像。」
MV 由天空走到大海 化身尋星女孩出海追夢
MV 方面同樣緊扣童話設定，上一章〈踏空氣的人〉，Vincy 「吊威也」飛上天空，飾演擁有踏空氣能力的女子；今次則由天空轉到大海，化身一個在海中尋找星星的女孩，為了成為特別的人而努力造船出海尋星。Vincy 表示角色與每個人的處境相似：「每個人都有想搵嘅嘢、想去嘅地方，但好多時搵極都搵唔到，望出去就係一片大海，唔知可以去邊。所以我呢個角色就係嘗試出海，去搵理想中嘅自己。」
場景由天空轉到大海，拍攝難度亦隨之升級。不熟水性的 Vincy 今次要親身落水，她笑言：「我係一個唔太識游水嘅人，淨係可以向前游，但我唔識浮，所以有少少緊張。」此外，MV 中藏有一個特別的「符文」，帶領她穿越不同故事，叮囑樂迷留意它會在哪個部分出現。
Vincy 蘇詠淳新歌〈沉進海的星〉已於各大音樂串流平台上架，MV 亦已上傳至 YouTube Channel，樂迷除了細味這份旋律及浪漫歌詞，更不要錯過 MV 中 Vincy 落水尋星的畫面。這段由海浪孕育的旋律，亦將推出日文版本，讓更多海外樂迷走進這個尋星童話，請多多支持並留意日文版推出。
Vincy 蘇詠淳 〈沉進海的星〉MV
一眾樂迷敬請聽歌再觀看 MV，一同重溫初戀時的悸動與甜蜜。
圖片：新城廣播、SONY MUSIC
