阿仙奴於香港時間日前（31日）凌晨舉行的歐聯決賽，與衛冕冠軍巴黎聖日耳門（PSG）激戰120分鐘後互無紀錄，最終在12碼大戰中落敗，無緣成為「雙冠王」。身為阿仙奴死忠球迷的藝人袁文傑，當然有留守電視機前與球迷一起看直播。然而，他目睹阿仙奴中堅加比爾（Gabriel）射失12碼一刻的真實反應，竟成為網民熱話，更被形容為「一秒變臉」。
對於被網民截圖瘋傳一秒變臉，袁文傑今天（２日）到新城廣播接受訪問時親自解畫，笑言這個說法並不準確：「其實嗰一刻都唔算係一秒變臉，你睇吓邊到有一秒變臉？我變咗好多下。」他更「投訴」網民為何不截取另一個更激動的畫面：「點解你唔cap第二下？上半場六分鐘入波嗰一刻，我即刻叫咗出嚟，嗰啲先係變臉。」
袁文傑解釋，自己當下其實相當冷靜，而這份冷靜是專業使然：「射完12碼嗰一刻，我覺得我好冷靜。因為我嘅冷靜，係必須嘅，因為我做直播的時候，我唔單只照顧自己嘅情緒，我要照顧聽眾嘅情緒。」他舉例說明自己當時的處理手法：「譬如加比爾最後一腳12碼，你聽見我嘅語調，我都係叫大家『唔好期望太高，真係唔好期望太高』。結果我自己都設定低咗期望，亦冇一個反應好大嘅落差。」
有網民稱讚袁文傑沒有情緒失控，他回應說：「呢樣又講得啱，因為係現場直播，現場係完全自己嘅感覺，我嘅風格係唔會拍枱拍櫈，嗰啲風格已經好out，唔受歡迎。」
除了歐聯決賽的反應成為熱話，袁文傑在訪問中亦分享了早前親赴倫敦、見證阿仙奴奪得英超冠軍的難忘經歷。他形容親眼見證奪冠巡遊，價值比入場睇波更高：「大家都知道飛過去買飛睇一場波係好昂貴嘅事情，但比呢個價值更加高，我哋飛過去嘅時候，唔肯定阿仙奴係冠軍，呢個先係最重要。」
他更提到在倫敦遇上熱心球迷幫忙排隊印冠軍「金章」的窩心故事：「攞完冠軍第二日，商店賣球衣，特別係金色的印章，非常搶手。我哋去到已經係上午靠近中午，店員話冇貨。結果我哋認識咗一位從澳洲飛過去支持阿仙奴嘅球迷，佢認得我哋，話第二朝早啲過嚟幫你哋排隊，後尾我哋印咗十幾件，因為每個朋友都有幾件。」
另外，袁文傑亦談到處境劇《愛·回家之開心速遞》預計於7月暫停一事，加入這個大家庭已十年的他表示：「一個劇集能夠維持到咁長時間，令到幾乎每一個角色都有觀眾去講，咁深入民心，大家真係要畀啲掌聲。依家出街，好多觀眾朋友都會大聲叫『潮偉』（劇中角色名），我覺得呢個已經係一個好大嘅成就。」袁文傑感恩公司之餘，亦表示：「雖然去年年底開始，我自己要求同公司合作嘅模式有啲改變，但有機會嘅話，我都會為呢個劇去盡一分力。」
