近日有市民在周五（6月13日）凌晨約4點幾至5點，有市民在奧海城公園發現一隻縮在櫈底嘅幼犬BB，被遺棄嘅呢隻都柏文幼犬雙耳慘遭修剪，更被用針綫將耳仔與紙杯縫在一起，以及出現咗脫水、肚屙嘅狀況，最終因爲感染犬小病毒腸炎不治。報警后，案件交由旺角警區刑事調查隊第十隊（動物罪案警察專隊）跟進。
根據接收的都柏文幼犬「520浪浪加油站」IG專頁透露，被發現嘅時候仲要撞正颱風「蝴蝶」狂風暴雨，幼犬瑟縮於奧海城公園櫈底，並出現脫水、肚痾狀況，因此懷疑係因爲幼犬患病而遭繁殖場丟棄，「520浪浪加油站」怒斥：「想問一問呢啲繁殖場幾時先至肯收手？有病就將啲狗掉咗出嚟係咪黐孖筋啊！發現呢隻BB嘅時候呢，佢個頭仲係有個紙杯喺上邊」。
當幼犬送到獸醫診所檢查時，不久後便離世，檢查證實因感染犬小病毒腸炎致命。「520浪浪加油站」持續更新有關狀況：「尋日抱佢入去見醫生嗰1分鐘，其實已經見到呢隻B女佢條脷係伸咗出嚟，但係我將佢條脷塞返入去，希望真係仲有一線生機可以救到佢亦都叮囑醫生要同佢立刻吊鹽水，但係已經整好晒個鹽水斗隻BB女就已經走咗。」
「我哋都通知咗善终公司嗰邊，亦都叫咗醫生幫『刀B』（都柏文BB）拆咗個紙杯佢，唔希望刀B走嘅時候帶埋個紙杯走」、「我哋唔希望刀B走嘅時候會帶埋啲線一齊走，再生嘅時候已經痛苦，唔希望佢走嘅時候帶着痛苦一齊走，所以我哋就作出呢一個決定我哋一定會幫刀B拆走啲線…。」
不少網民震怒，留下評論，表示「冇人性」、「拒絕虐待動物」。亦有網民唔明白點解耳仔要和紙杯縫在一起，有網民好心解答：「係因為Doberman bb 剪完耳啲骨仲未完全成形，要有野cool 住隻耳仔大個先會變立耳剪耳剪尾的確好殘忍，但係依個係【傳統】, 要改變都唔係一時三刻既事。更何況仲有人覺得靚係緊要果佢地既感受。Btw 祝所有無良breeder 落地獄。」
唔少人為咗追求寵物嘅美觀而對其進行「剪耳立耳」、「剪尾」等手術，忽略動物承受嘅痛苦，若真心愛護動物便應接受動物自然的樣子，不該通過外在手術將寵物改變。
圖片：IG@520浪浪加油站
