之前帶觀眾參觀咗位於港島同九龍嘅博物館，今次同大家嚟到位於新界沙田嘅香港文化博物館。香港文化博物館有唔同展覽介紹香港嘅流行文化，部分展品仲係大家由細睇到大，好有親切感！事不宜遲，立即跟譚玉瑛姐姐同麥皓兒「香港文化博物館一日遊」！
「滄海一聲笑—黃霑」—紀念黃霑對現代流行文化貢獻
第一站來到專題展覽「滄海一聲笑—黃霑」。呢個展覽特別為紀念黃霑逝世二十周年而籌備，精選大約一百四十套展品，介紹霑叔喺歌、影、視、廣告以至文學方面走過嘅足跡，大家亦可以更加了解佢喺現代流行文化嘅貢獻。
我哋可能多數喺電視上見到霑叔，又或者聽唔少佢有份參與嘅音樂。其實佢仲係一位十分出色嘅廣告人，當年播到街知巷聞嘅家計會宣傳廣告歌曲〈兩個夠晒數〉就係出自霑叔手筆。喺音樂方面，霑叔創作過無數家喻戶曉嘅歌詞，其中當然唔少得代表香港人精神嘅〈獅子山下〉啦！
滄海一聲笑—黃霑
日期：即日至2月10日
地點：香港文化博物館一樓 專題展覽館一至二
「瞧潮香港60+」—了解香港流行文化發展軌跡
跟住嚟到譚玉瑛姐姐主場──「瞧潮香港60+」，展現香港流行文化嘅演變。當中展出有關《430穿梭機》同《閃電傳真機》嘅展品，講到當中嘅靈魂人物，當然不得不提香港大眾嘅童年回憶──譚玉瑛姐姐！譚玉瑛姐姐都感嘆勾起唔少回憶，「有啲珍貴展品同相片，我自己都冇keep到啊。所以唔好話你啦，我自己睇返都勾起好多當時嘅回憶。」除咗兒童節目，呢度仲有好多電影、電視、音樂、電台廣播等等相關內容，俾大家了解香港過去嘅流行文化發展軌跡。
「瞧潮香港60+」
香港文化博物館一樓
「平凡•不平凡－李小龍」—回顧李小龍傳奇一生
香港文化博物館同李小龍基金會攜手呈獻「平凡•不平凡－李小龍」展覽，展示大約400件珍貴文物，同大家回顧李小龍傳奇一生。今年亦都係李小龍85歲誕辰，係個好機會認識李小龍堅毅嘅人生經歷！展品包括呢件李小龍生前喺最後一部電影《死亡遊戲》入面著過嘅黃色戰衣。展覽仲設有大型光影多媒體展示以及互動項目，俾大家近距離認識一代巨星。
「平凡•不平凡－李小龍」
香港文化博物館二樓
專題展覽館六
「金庸館」—進入金庸筆下武俠世界
睇完李小龍嘅現代武術，跟住一齊進入金庸筆下嘅武俠世界，參觀「金庸館」。筆名「金庸」嘅查良鏞博士，由1955年起開始發表佢首部武俠小說《書劍恩仇錄》，大受歡迎，其後總共寫咗十五部膾炙人口嘅武俠小說，讀者遍布全球。郭靖、黃蓉、楊過、小龍女、喬峰、令狐冲、韋小寶，每個角色都深入民心。金庸嘅武俠小說，曾經改編成為無數電影、電視、漫畫、廣播劇、舞台劇，以至潮流電玩同各類文創產品，對香港呢幾十年流行文化影響深遠。
「同心迎國慶 — 粵港澳大灣區非遺匯瑞」展覽—認識國家級非物質文化遺產
喺香港文化博物館除咗睇到流行文化，仲可以睇非物質文化遺產手工藝！「同心迎國慶 — 粵港澳大灣區非遺匯瑞」展覽，介紹大灣區十一個城市嘅表演藝術、傳統手工藝、節慶習俗等等非物質文化遺產項目，當中仲包括國家級非遺項目。
「同心迎國慶—粵港澳大灣區非遺匯瑞」
日期：即日起至3月31日
地點︰香港文化博物館一樓 聚賢廳及庭院
「藏域梵珍．佛學之路—徐氏藝術基金捐贈佛教文物展」—多角度認識中華文化
除咗以上介紹過嘅內容之外，喺香港文化博物館，仲有幾個展覽，值得大家嚟睇㗎！「藏域梵珍．佛學之路—徐氏藝術基金捐贈佛教文物展」，就係從歷史、藝術及文化角度，介紹佛教嘅傳入同流播，展出70項由十七世紀至二十世紀嘅藏傳佛教藝術珍品，非常珍貴，亦令大家有多一個角度認識中華文化。
「藏域梵珍．佛學之路—徐氏藝術基金捐贈佛教文物展」
日期：即日起至2026年10月26日
地點︰香港文化博物館二樓 徐展堂中國藝術館
「無域 ─ 香港國際海報三年展」—展出155組得獎及入選海報
「香港國際海報三年展」今屆以「無域」為主題，探討喺現今數碼科技之下，海報點樣發揮傳遞訊息嘅功能，穿越無限界域，總共展出155組得獎同入選海報。
「無域 ─ 香港國際海報三年展2024」
日期：即日起至5月5日
地點︰香港文化博物館一樓 專題展覽館三、四及五
香港文化博物館有咁多唔同嘅展覽，其實一日真係睇唔完，嚟之前可以好好計劃吓喇！剩係嚟香港文化博物館，已經可以睇到好多極具時代意義嘅文化展品，仲可以認識更多唔同範疇嘅歷史同藝術！部份展覽亦都有導賞服務，唔好錯過呀！
香港文化博物館嘅交通都好方便，喺車公廟站行過嚟只需要5分鐘，沙田同大圍站都行到過嚟㗎。
開放時間
星期一、三至五：上午10:00至下午6:00
星期六、日及公眾假期 ：上午10:00至下午7:00
逢星期二（公眾假期除外）
地址
新界沙田文林路一號
圖片：康樂及文化事務署
