陳曉東最近推出新歌《蒼鷹與少年》，今日專誠來到新城廣播，接受知訊台台長程凱欣主持的《原來生活好快樂》訪問，東東透露新歌歌名取材自宮崎駿的電影，花了三日以AI輔助剪輯新歌MV，「玩吓啫，我唔係好專業嗰種，我好似一個生學嘅玩家，剪得都OK喎，索性就咁出，因為係自己歌。」
東東於8月將展開以廣州為首站的「REFLECTION心有獨鍾30周年」巡迴演唱會，問到會否加入AI這個技術？他說：「今次有個3D嘅裝置，導演幫我搵，聽講呢個裝置，未有歌星用過，我哋會配合後面個WALL，希望可以做一啲效果，而家一直都加緊料，除咗視覺上、音樂上，亦都會加新樂器、新環節，不停開視頻會，加多啲元素喺演唱會入面。」
提到演唱會的歌單，東東都感到很頭痛，他笑說：「導演叫我寫，我喺半個鐘寫咗80幾首歌，其實一個演唱會得廿幾首歌，咁我將啲歌變成Medley，導演話唔可以全部都Medley，有啲歌係唱番Full Version，唯有我哋出唔同Rundown，一場唱唔晒，就下一場唱。
至於嘉賓方面，東東會邀請兩位寶貝女，「而家訓練緊，由細到大，我都想佢哋同音樂接近啲，因為我覺得人有音樂，會比較浪漫啲，開心或者唔開心，都可以同音樂連結，佢哋一直都有學芭蕾舞同街舞，但佢哋學芭蕾舞，我好肉赤，因為佢哋去到tip toe嘅時候，我費事佢哋對腳跳爛咗，我就暫停，不過近排開始番，排舞老師都好嚴謹，拉筋都拉到喊，所以我都唔捨得，我叫排舞老師慢慢嚟，唔使做tip toe呢個動作，跳得幾多得幾多。（有冇遺傳你唱歌好聽？）佢哋好犀利，4歲跟我喺台灣上演唱會，5歲上紅館，同我唱《劃火柴》，而家10歲又可以跟住爹地。（太太會唔會一齊上台？）唔會喇！」
