藝人黎諾懿日前到新城廣播接受李有毅（Ben）及兒子李國煒（Benson）主持的《Ben同Benson『Chur』到行》訪問，諾懿在節目中罕有地揭露自己真實的性格反差，他坦言熒光幕前溫文儒雅的形象只是一面，私下的他曾經脾氣火爆，而改變他的正是其太太李潔瑩。
黎諾懿在節目中形容自己是典型的雙子座，擁有兩面性格，對於不熟悉的朋友，他表現斯文，但在熟悉的朋友面前則會展現真性情，他笑言：「如果我太太講，其實我同一個『老粗』係冇乜分別。」他自爆十多年前性格衝動，回憶道：「陳法拉改咗我個名，叫『火猴子』，因為我屬猴，比較火爆。」他指當年因年少氣盛及不懂尊重別人，導致性格暴躁。
談及與太太的相處，黎諾懿充滿感激，他深情表示：「佢係我嘅『樹窿』，我有啲咩都會返去同佢講。」他坦言認識了太太後，他的脾氣才開始改變，「我識咗我太太之後，我嘅脾氣開始變得愈嚟愈好，佢教識我做人唔需要同人有衝突。」他更分享了一個為愛改變難忘事：「我追佢嘅時候，因為佢唔鍾意人食煙，我為咗追佢，我用咗兩日就已經戒咗。」
諾懿與太太育有兩名兒子，他跟囝囝相處像朋友，除了不會打罵他們，更會放任他們做「曳事」，諾懿解釋：「男仔太過保護佢唔得，佢將來都有家庭要照顧，所以畀佢撞吓板。最近上中文堂，老師嘆氣，佢又嘆氣，老師問佢做乜嘆氣？佢反問老師『咁你又嘆氣』，佢好據理力爭，尊師重道都重要，但個仔邏輯觀念上又冇錯，所以教佢時要搵番個平衡點。」
然而，諾懿十分著重兒子們的溝通技巧，希望他們懂得四種語言以上，他稱：「我冇乜讀過書，英文、普通話唔叻，之前參加內地綜藝節目有啲唔開心，因為唔能夠同人暢所欲言，見到謝霆鋒同人用英文傾計好羡慕，希望我個仔將來都可以好大方同人哋傾偈。」
