避免中年返貧唔靠運氣靠地基 -

最近大家見我成個有禮貌KOL，完全唔搶口，加上復出跑山都知我乜事，短炒真係風雨飄渺，經歷咗一次嚴重失利，炒納指真係輸到差唔多爆廠，真係遇到炒股最怕的爆倉。但幸運嘅係，我嘅投資組合仲有「地基股」呢個支柱，慢慢為我提供現金流回血，提醒返我，錯唔緊要，最緊要係俾自己有錯嘅空間。

呢次失利，可以講係我典型嘅性格陷阱，沽納指呢個動作其實冇問題，問題係我自己心雄，將風險過份放大，忘記咗提防市場高位嘅波動性。結果就係贏谷輸縮變咗贏少輸大。

如果冇地基投資法嘅框架限制自己，我可能會更慘，所以我成日都提朋友，投資之前定好一套規模俾自己，唔好諗住邊炒邊轉，因為炒到咁上下，通常都係亂咁黎，呢個係人嘅天性，有做開短炒嘅朋友一定明我講乜。

即係，有時啲朋友會話呢個係我姐，佢一定唔會。但我都會同佢哋講，做得全職炒家投資日日都會做，唔一定日日都咁好精神。

可能我有一日飲酒飲大咗，可能我中流冒唔係咁舒服自己唔覺，一下買多咗，隨時唔見咗半份身家。有時飲多幾杯，結果醉咗，講錯說話、做錯決定，醒先返嚟後悔，好常見。好似今次炒納指，就係我飲醉咗嘅一刻：市場熱鬧氣氛令我興奮，見到個倉位創新高就好似啲酒精，放大咗我嘅貪念同衝動，結果一嘢轟咗落去，輸到痛，先識醒。

但有地基股嘅好處就係，佢係永遠穩定、可靠，唔會受我每日嘅情緒影響。呢次輸咗之後，我冇需要急住追回，因為我買落好多地基股，自製現金流，唔使急住又要追回報，或許希望追返自己份身家，卑左一個機會我冷靜佔我倉位1至5%嘅短線資金輸清光都好，唔緊要，一年內地基股嘅股息就補返嚟咗，我痛定思痛之後，繼續可以再博過。

如果冇呢個地基，我可能會飲酒借愁愁更愁，繼續亂操作，結果越輸越多。地基股就似一個忠實夥伴，唔會因為你一時錯而離開你，只會默默支持你翻身。又唔會黑你面，又唔會無啦啦嬲你，又唔會拋棄你。無錯呢個朋友係買返來嘅，但唔係人人都願意花錢花時間買呢個朋友返來，最少我願意，而佢又真係每次都幫到我，做到共同成長。唔止要人冇事，個大倉都仲係到，錢係到，先有機會。