與劉嘉玲結婚多年的梁朝偉，一直堅持過二人世界，劉嘉玲亦直言放棄了生育念頭，已習慣兩支公的梁氏夫婦，在婚後第十六年迎來兩名新成員——一隻叫Batman，另一隻叫Benjamin，一黑一白，是兩頭超級可愛的拉布拉多狗仔。
劉嘉玲近日出席公開活動時，提及家中多了兩個BB，頻頻大呼開心，「日日都好開心，我從來都未試過朝早起身係咁開心，他們去了便便及尿尿，我都不介意幫佢哋執，又餵佢哋食嘢，他們還是BB，七點鐘就準備起身。」
嘉玲表示，梁朝偉好鍾意狗，但她一直反對他養狗，「我忽然間好想養，呢個轉變好大，（偉仔好開心？）佢好開心，興奮到不得了，而家狗仔跟我多啲，因為兩隻狗一返屋企，梁生就去了東京電影節，而家日日都要開視像給他睇狗仔。」由二人世界變成一家四口，嘉玲話本來屋企好靜，而家日日都好熱鬧。
嘉玲透露有安排狗隻訓練員為愛犬培訓，一星期會練三次。問到愛犬的名字，嘉玲姐稱黑色的狗狗叫Batman，而白色的就叫Benjamin，兩個名都是B字行頭，加起來就是「BB」，而Benjamin是偉仔曾飼養的一隻愛犬名字，作為對牠的紀念。梁宅多了兩個「BB」，從此一家四口幸福滿瀉。
恭喜嘉玲！恭喜偉仔！
圖片：IG@carinalau1208
