人氣女子組合COLLAR近日舉行首個演唱會，昨天（24日）是演唱會尾場，在開Show之前，多位成員被爆出緋聞，包括許軼（Day）與魏念恩（Nathan）相戀一事，雖然經理人回覆他們是曾經了解過，但當事人還未有親身回應；另一個則是傳出邱彥筒（Marf）與林家熙（Locker）相戀；還有王家晴（Candy）被指在IG買粉絲，在演唱會完結後，COLLAR接受傳媒訪問眾女逐一回應。
Day強調目前單身 認曾經同Nathan了解過
許軼（Day）被爆出與魏念恩（Nathan）拍拖一事，令Day形象大跌，唔少Fans表相當失望，更在她的IG留下負評。Day表示這個新聞一出，確實有影響心情，原因是害怕大家將焦點放在這件事情中，怕大家在演唱會的努力白費。記者追問是否因為事情被發現，所以分手，Day強調指二人是有了解過：「同之前經理人講嘅一樣，我哋係有認識，但係就冇繼續一齊，冇繼續去了解落去。（了解過發覺唔適合？）的確有認真了解過，但係依家係單身，係朋友。」
Nathan IG放負疑想輕生 Day有慰問對方：都有關心佢
而早前Nathan在IG放負，仲疑似想輕生，事後被發現在海邊危坐，被送往醫院治療，Day承認有因為這件事去關心他：「都有關心佢，大家都好擔心，見到朋友發生呢啲咁嘅事都幾擔心。」去年7月Nathan捲入前女友輕生一事，還被女方家屬爆料分手後還問對方借錢，令Nathan形象盡毀，Day坦言：「我認識佢嘅時候已經發生咗呢啲事，都冇特別影響啲咩，大家了解完之後都係朋友。（點解唔啱？公司壓力？）因為我熱愛工作，公司都唔會過問我哋認識朋友。」
Ｍarf大方承認與Locker拍拖
另外傳出邱彥筒（Marf）與林家熙（Locker）相戀，Marf大方承認戀情，指沒有公開是因為想低調：「我都鍾意低低調調平凡生活，所以冇特別公開或者特別去講啲咩。」Marf續說二人已交往了一段時間，但被指同居一事就沒有回應：「冇特別公開，呢啲就唔特別講啦，私人嘢可唔可以留返畀我自己呀，我都好少拍拖經驗㗎咋其實。」
Candy指賺錢辛苦 從未IG買粉絲
最後王家晴（Candy）回應IG買Fans一事：「我咁辛苦賺返嚟嘅錢，我要交學費，買米粉囉，買蒟蒻米粉，完全冇買粉（絲）。」
