藝人黎耀祥（祥仔）與麥長青（麥包）今天（11日）到新城廣播接受薛家燕、思敏及范振鋒主持的《開心大派對》訪問。兩人主持的旅遊節目《江湖見》第二季正熱播，延續第一季風格，走訪金庸筆下山河，沿長江與黃河流域遊歷四川、浙江、河南、山西等地。席間二人分享拍攝趣事，引得全場笑聲不斷。
談及拍攝日程，祥仔透露製作耗時極長：「第一輯拍咗六十幾日，但分開去，一次過去唔到咁多地方，因為要籌備同搜集資料，成個製作都要半年，第二輯都係差唔多時間。」麥包被家燕姐笑指體形又胖了，他即反駁：「已經瘦咗啲！我哋兩個都為食，嗰啲串燒食咗百幾串，但每串啲肉好少。」
提到難忘景點，祥仔指長江三峽之巔最宏偉：「好多地方好難先去到，平時唔會去，又遠又辛苦，我哋去咗好多地標式景點。」家燕姐笑言知道自己為何沒獲邀：「因為我行唔到上山頂。」
他們又提到前往敦煌戈壁沙漠拍攝：「我哋只拍外圍同航拍，驚有沙漏會跌落去。」麥包則形容山路險要：「啲山路又斜又窄，有啲位要爬，後尾有人幫手抬我上去，但抬得好穩陣。自己都有啲唔好意思，但佢哋靠做遊客先有收入。」
談到敦煌騎駱駝體驗，兩人大呼「好攰」：「騎一次百幾蚊，坐完好攰，搖吓搖咁。當地人話買駱駝唔貴，但出一個牌做生意就貴，要過百萬，但又搵得返。最旺季一日三萬人次，人山人海，所以啲駱駝都唔想撈，哈哈！」祥仔更驚喜發現：「現場仲有駱駝紅綠燈，佢哋都要守秩序，但見到斜路就唔會行過去，好醒目。」
家燕姐盛讚節目風景優美，問會否拍第三季，祥仔笑言：「諗起都驚，好多時5、6點就起身，要整妝頭、執行李，但係好值得。」
重溫節目，請於7月11日下午二時登入知訊台《開心大派對》：https://www.metroradio.com.hk/MetroInfo/
圖片：新城廣播
