天后陳慧琳（Kelly）近日推出新歌《時光厚禮》，勇奪新城廣播的《新城勁爆流行榜》本地榜及國語榜第1位，成績十分亮眼。近日Kelly接受新城八大家的獨家訪問，談到人生家庭、事業、朋友等，佔據Kelly頭3位的竟然冇老公份？
陳慧琳談人生放第一位的絕對係小朋友：同老公所有行程都以佢哋行先
Kelly在新城八大家的專訪時，談到現時人生中放第一位絕對是家中的孩子，她坦言：「排位一定係小朋友，我同老公所有行程都以佢哋行先，因為學業要計劃定。譬如說已經要計劃定暑假要去邊度，因為要為佢將來大學去邊度。總之好麻煩呢個，所以第一位點都係小朋友先。」
51歲陳慧琳似足後生女 健康排人生第二位
另外現年51歲的陳慧琳經常被外界大讚容貌似足後生女，完全不像已踏入5字頭的女性。而Kelly保持靚樣秘訣其中一個原因是健康她放在人生中第二位：「身體健康，要注意身體，唔可以話做嘢做到唔瞓覺，唔得嘅，身體都緊要啲。」
Kelly以事業為重 友情其後：可以係事業搵到朋友
Kelly近年忙著巡迴演唱會，在圈中她也是出名人緣極好，事業或友情，那一樣是排在第三位，Kelly坦言是工作：「我一定係事業行先，因為可以係事業搵到朋友，成日做嘢都見。」
老公三甲不入即補飛：家庭係擺第一位
說到最後，Kelly一直沒有將老公放在頭三位之中，Kelly表示沒有忘記，老公是她心中很重要的人，因此第一位是孩子她便重新改說法：「老公都係同小朋友一樣，家庭係擺第一位」。
考慮安排兒子到外國升學 自爆勁煩惱：寫到見工咁樣先收你
剛開始時Kelly說到兒子放在第一位，近來要忙巡演工作的她，若關係到兩位兒子的學業，她表示會先暫停演藝工作。Kelly大仔「蝦餃仔」劉昇（Chace）今年已經15歲，就讀中三，但她已開始為「蝦餃仔」計劃將來升大學的問題。Kelly苦惱的說以前讀書時期升學也沒有這些事：「升學問題原來咁煩我都唔知，以前又唔使鋪咁多路。依家又要拎經驗，寫到見工咁樣先收你。學分就唔使講啦，要做好多嘢，我都嚇一嚇。」貴為一名天后級藝人，Kelly笑言兒子升學這方面並沒有幫助：「如果要到外國讀書咁就係唔識我啦，所以都要靠佢自己。」
陳慧琳不捨兒子離開身邊到外國升學
兒子將有機會到外國讀書，雖然並未落實，但Kelly心情已十分矛盾：「你又想佢去到好學校，但當佢去嘅時候你又唔捨得，冇辦法啦，為佢將來都要去一間好學校，要啱佢啦。」
陳慧琳不反對「蝦餃仔」拍拖 列3大禁止做嘅事
「蝦餃仔」已經15歲，若要去外國讀書分分鐘會在當地認識到女朋友，Kelly認做好心理準備兒子會隱瞞拍拖一事：「如果搵到個真係自己鍾意嘅會真係畀我見掛。（會反對拍拖，因為要讀書？）冇講定反對咩，但一定反對食煙、飲酒、吸毒呢啲，講到明。但拍拖呢啲緣份就好難講，咁我同我老公都係大學識。」
