上周日播出的TVB戀愛真人騷《女神配對計劃》，旋即成為網絡熱話，特別是「愛.回家CP」曾展望（GM）冧爆追求葉蒨文（Sophie）一段，二人真情互動睇到觀眾相當肉緊。
近月因夥拍火火、吳若希主持《奇情谷》的曾展望曝光率大增，《女神配對計劃》出街後，GM人氣一夜勁升兼成為城中筍盤。
《女神配對計劃》節目內，GM一改平日cool爆形象，豁出去跟Sophie講出心底話：「我好少咁主動，因為怕瘀，但更加唔想見到你畀人追走……」更鬼馬表示自己跟林子祥同一日生日，成功氹到Sophie為佢戴上「心動頸鏈」，兩人面對面戴鏈一刻，全個錄影廠被粉紅色泡泡包圍，甜到漏油！
這段緣分早喺2021年J2節目《不能只有我看到的便利店追女神食譜》已萌芽，當年初出茅廬的GM已經對Sophie有好感。之後喺《愛.回家》做「MC配」，默契好到連監製都讚。Sophie接受訪問時就話：「公司冇乜邊個細眼仔似佢咁型，不過佢細我5年，加上我覺得圈內男仔比較複雜。」即使互相有愛意，遺憾當時愛神未有眷屬這對小情人。
「MC配」由《愛.回家》延伸到《女神配對計劃》，劇情峰迴路轉，在「女神」節目出街後，有網民爆料指不時在荃灣撞到二人出雙入對，有同居的嫌疑。對於似曾曾的傳聞，曾展望趁機在在奇情谷》回應：「（同居）我都想係！不過我未有咁嘅福份，多謝大家！」間接否認傳聞。
網民窮追不捨、考古王上身，又翻出數年前Sophie在《愛.回家》跟「朱凌凌」吳偉豪的感情線，朱凌凌曾向Candy表白，編劇更安排二人在頭髮花白的年齡再重聚的假想穿越劇情，非常惹笑。
女神被爭奪的戲碼不停被翻出，回到現時空，網友紛紛表態話：「MC配先係絕配！」「GM快啲用道法追女啦！」、「Sophie比個機會道士仔啦！」連主持林盛斌都話：「佢兩個真係好有chemistry！」後續的戀愛劇本會如何發展？連小編都好緊張吖！
現年27歲的曾展望（GM）擁有與眾不同的人生軌跡。這位在美國洛杉磯出生、3歲移居香港的藝人，童年時期曾受過度活躍症困擾，一度需要藥物治療來提升專注力。然而，這些挑戰並未阻礙他追求多元發展的決心。
畢業於荃灣地區名校聖公會林護紀念中學、香港理工大學會計系畢業的曾展望，在2018年加入TVB主持《#後生仔傾吓偈》正式踏入演藝圈。令人意外的是，這位看似普通的年輕人，竟在廿歲出頭時有過一段特殊經歷──用一週時間就成功考獲七品道士資格。
講起這段奇幻的修道經歷，曾展望憶述，修道期間每日清晨6點就要起床聽大師講經，繼而持續跪拜聽經直至晚上9點。這種嚴格的修行方式和考試程序，讓他真正體會到道教文化的深厚底蘊。
從會計系高材生到持證道士，再變成今日獲女神認證的筍盤，曾展望的獨有魅力不只迷倒葉蒨文，相信不少女fans都被他的真誠打動，隔住個mon都想幫Sophie撳燈。
圖片：TVB、IGQrandalgmm、@sophieysm
