日前《HI MIRO! 見面祭2025》由姜濤、Edan、Jer和Stanley打頭陣，連續兩晚（6月1及2日）活動幕幕精彩惹笑！在首晚拋圈遊戲中，姜濤和Stanley慘敗，要合力抬起結實的Jer，Edan出手相助時卻意外讓Jer碰到「小爵爵」，全場尖叫！
第二晚則由大隻佬Stanley勝出，輪到Edan和Jer抬起姜濤，一向有份量的阿姜被抬起時得意忘形，仲舉V字手勢狂扭：「早知飲多兩啖水增重啦！」被問到對兩位隊友體力有冇信心，姜濤即窒Edan：「Edan差啲啦，阿Jer就firm好多，年年都可以玩呢個遊戲！」
姜濤在深情環節大展模仿功力，先後cosplay少女Jer和Edan，更爆料Stanley常對鏡自摸胸肌檢查線條，讓Stanley羞得想逃下台。四子互動爆笑，MIRROR成員默契度Up Up Up！
講到想同粉絲傾吐的情深說話，盡在不言中，姜濤首晚憑歌寄意唱《好得太過份》：「希望大家唔理支持邊個歌手，都多啲撐香港音樂同電影！」第二晚就更感觸，話每日睇粉絲DM都被激勵：「見到自己作品影響到人真係好開心，最近好多『姜糖』拍跳舞片俾我，搞到我都想快啲出新歌！」跟住即席獻唱新作《On a Sunny Day》，粉絲聽到耳油都出晒嚟！
見面祭尾聲，一向寵粉無極限的姜濤特別走到輪椅區，為行動不便的MIRO送上超貼心互動！只見姜濤單膝跪地與每位粉絲近距離交流，當遇到一位元祖級姜糖時，他突然親暱地喊「契媽」，還俏皮地說：「斟茶呀喂！契媽飲茶！」逗得這位媽媽級粉絲笑得合不攏嘴，連聲回應：「乖！乖！」
這位「契媽」還遞上預先準備好的小字條，姜濤看完立即豎起大拇指回應：「會呀！」不過可能跪得太久，姜濤聊天時突然腳仔軟，差點失去平衡，幸而在旁的實Q哥哥及時伸手相救，姜濤才不至倒地。事後「契媽」在社交平台發文跟姜家人分享喜悅，笑言姜濤是他契仔，她寫道：「見面之後我正式宣佈姜濤成為我的契仔，以為糖糖要叫阿姜我一聲契哥，雖然係一句戲言，但係我非常之開心，有一個咁有才華，咁靚仔，咁溫柔可愛嘅契仔，人生夫復何求。」
「母子」溫馨互動被粉絲瘋狂轉發，不少人稱讚：「好羨慕呀」、「契媽真係好幸福」、「我都想上契」、「呢個契仔不得了」
圖片：網上圖片
