最近因新冠和流感又開始肆虐，除咗睇醫生食藥，仲有咩方法可以令自己或者屋企人快啲好返？近日，一港女在社交平台以「超級顛嘅食療家」發文，稱自己當日同屋企人覆完診之後經過荃灣一間涼茶鋪，每次都見到好多人排，所以今次咁啱屋企人唔舒服，所以就諗住試下。
估唔到一排就一個鐘頭有多，仲要係大熱天，發文嘅事主都笑言：「最唔鍾意排隊嘅我，真係為愛堅持」。呢間小店主推多種唔同療效嘅湯水包括增強抵抗力、化痰止咳、疏肝解毒等。舖頭更大大隻字列明食材。最終用咗$203買咗7枝湯水，「正確來講，係佢配畀我。要由新界拎返出九龍，我都要讚下自己。」
究竟點解會有咁多人排隊買？發文者就講出老闆嘅2個奇招：超認真同有耐心再加埋WhatsApp錄音服務。仲有好多街坊顧客都會問得好清楚，「唔係講笑，個個係度問診，見醫生都未有咁詳細」、「而老闆又真係好認真問你情況，仲會係你WhatsApp錄音，驚你唔記得。真心有啲佩服」。
網友紛紛都留言，讚功效顯著，同埋老闆有耐心又夠細心，每個都會錄音，而且價錢又實惠，發文者亦稱：「Anyway，無論有無效（後面街坊話得）。我覺得$203係抵嘅。」
圖片：Threads
