自新西蘭畢業返港後，姚焯菲（Chantel）新作浪接浪，繼《愛.回家》集數出街後，全新跳唱單曲《New Fantasy》MV正式於昨晚（4月9日）上架。小公主形象深入民心的Chantel，決心暫別可愛風，在《New Fantasy》散發陣陣知性、型格的女人味。
作為Chantel今年第一首派台歌，加上已18歲大個女，新歌以「蛻變」為主題，向歌迷展示全新形象。MV之中Chantel連場熱舞，為了盡善盡美，事前不斷上堂備戰，她說：「為咗今次MV練咗十幾個鐘，同埋我覺得最難係記好每個動作，記得之後仲要花好多時間琢磨點樣做得最靚最流暢。」
早在上周《New Fantasy》MV面世前，Chantel急不及待在社交平台threads貼出音樂檔，與樂迷分享捱出作品的喜悅，鬼馬表示：「前排threads上有人講tvb啲歌好難聽？我尋日搵到呢首，我諗你哋聽完會即刻上癮。」有網友驚訝小公主坦率可愛，留言回覆「你講嘢都幾大膽」。
對於Chantel在threads提出的「疑問句」，網友紛紛表意見「TVB啲歌點會難聽？尤其是聲夢」、「真話唔好拎出嚟講，but欣賞你」、「好聽到爆炸」、「只能說呢首例外」、「真係要聽下先知係咪難聽，但係你呢首都幾好聽」、「已上癮」。
Chantel大個女，識得玩threads幫自己新歌做宣傳，由形象到跟fans的網上互動都撤底呼應「蛻變」主題。昨晚《New Fantasy》MV上架後，小菲象loop完又loop， 大家都發現了當中有個小彩蛋，如名模般存在於MV的Chantel竟穿上了七件分別印有以往個人單曲封面的外套，在鏡頭前逐一除下。
Chantel特別喜歡新歌帶出的一份自信、堅定感覺，她表示：「歌詞第一句『高踭我踏前一寸』，已經可以令大家可以幻想到個畫面，我唔理側邊嘅目光，著住高踭鞋，我要望前，要好堅定咁向前行。」重申有自信的感覺就是帶給大家的New Fantasy，「大家可以聽埋我之前嘅作品，去留意下個分別，希望大家聽完呢首歌都會有一個fantasy，會不停喺個腦play緊，好想繼續聽，會有一個每日都play呢首歌嘅衝動啦！」
圖片：Threads、IG@chantelyiu
