千辛萬苦，終於攞到個P牌！揸住老竇架七人車，FF緊自己揸嗰架係 GTR、痛車、黑玻璃…，any肥，有車就可以同BB落日飛馳聽歌看海… 「砰！」FF未完就GG，除咗打電話搵老竇求救，仲可以點做？ 😱
OMG！交通意外要點做？
首先，保持冷靜，千祈唔好私了！唔好私了！唔好私了（重要的事講三次）！就算你覺得可能係自己嘅錯，又或者「以為」賠返一千幾百係小數目，都唔好响撞車呢刻同對方承認責任，或者作出任何賠償安排，一切都應該留畀保險公司去處理。就算呢刻你覺得係小數目，但日後對方可能會再向你作出追討（有可能係天文數字），如果你已經私了咗，之後保險公司就有權拒絕賠償。
穩陣嘅做法應該係咁：
1.即刻報警
無論意外大定小，有冇受傷，最好係有個官方紀錄，對雙方都有個保障。
2.記錄重要資料
盡可能抄低對方資料，包括車主同司機姓名、聯絡電話同地址、車牌號碼、保險公司名同保單號碼。最好就梗係影埋相拍埋片，清楚記低撞車後兩架車嘅狀況，以防日後爭拗。
3.通知保險公司
聯絡自己嘅保險公司，等保險公司話你知下一步要點做。之後如果有任何關於呢單意外嘅文件，例如係口供紙、警方調查報告、法庭傳召通知書等等，記得要盡快交畀保險公司﹗如果自己架車有需要去維修，都唔好心急即刻整，你可以搵車房報咗價先，再交畀保險公司核實維修費用，等佢哋同意咗個價錢先整，咁就放心啦。
| 提提你： 有啲人因為怕影響「無索償折扣」，即係NCD，明明撞咗車都唔報保險，咁諗就唔啱喇！雖然响處理索償期間，保險公司有可能會扣起個NCD，但如果事後係無須索償，有啲保險公司係容許車主申請拎返個NCD。唔肯定嘅，就問清楚保險公司啦﹗ |
三保 vs 全保
簡單講，只要你揸架車出街，你架車起碼要有有效嘅第三者責任保險，俗稱「三保」。呢種保險係分兩部分：1) 第三者人身傷亡；2) 第三者財物損毀。人身傷亡呢部分係法定要求，冇買而揸車出街就係違法。三保主要保障意外中對其他人造成嘅傷亡或財物損失，但自己架車撞爛咗就唔包。
如果想保埋自己架車，就要揀綜合保險，俗稱「全保」。買嘅時候要留意個保額，一般會根據架車嘅市場價值嚟釐訂，考慮因素包括車款、車齡等等。
新牌仔車保Q&A
問：P牌司機出事要畀多啲墊底費，是咪真？
答：一般汽車保險都設有自付額，或稱墊底費，你需要自行承擔保單上列明嘅部分費用，餘額先會由保險公司賠償。一般嚟講，「駕駛經驗不足兩年」嘅P牌司機，索償時要承擔額外嘅墊底費。
問：太後生係咪買唔到車保？
答：保險公司會要求車主填報「指定司機」，而好多保險公司都會訂明「指定司機」嘅年齡下限，一般係25歲。未滿25歲嘅車主或者司機未必買唔到車保，但可供選擇嘅保險公司可能會少啲，保費亦會相對貴啲。
問： 賣車個經紀Sell埋我買車保，跟佢買得唔得架？
答：有啲汽車經銷商會提供汽車保險中介服務，接受佢哋嘅服務之前，記得先留意佢哋係咪獲保監局授權嘅持牌保險中介人，上保監局嘅持牌保險中介人登記冊（https://iir.ia.org.hk）睇睇，就一清二楚啦。
揸車要小心，撞車處理要謹慎！
學車嗰陣師傅成日提大家：凡事向最壞處諗。就算自己揸車好小心，你永遠都唔會知道其他司機諗緊乜。所以，買車嗰陣就要揀啱自己需要嘅汽車保險，等保險公司同你分擔萬一遇到意外時嘅個人責任同財物損失！唔好彩真係遇到交通意外，就記得影低證據、報警、同通知保險公司喇﹗
