入O Camp諗住識吓新朋友，本來以為玩吓ice breaking就輕鬆pass，點諗到要考埋體力架﹗「嘭」﹗膝頭哥傳嚟劇痛…
呢一刻，既然腳已斷，call白車入急症室是常識吧？問題係… 呢啲非緊急嘅傷勢，排公立醫院分分鐘等到天荒地老，等嘅途中除咗拍吓片呃吓like，仲可以點做？
如果唔想响公立醫院等，想轉去睇私家但又擔心洗費貴，可以問吓自己或者阿爸阿媽有冇幫你買醫療保險、或者包含醫療保障嘅意外保險。有嘅話，就有機會claim到因為呢次意外而引起嘅醫療開支，咁就放心睇私家醫生啦！
意外保險 vs 醫療保險
人生就係咁，意外隨時殺埋身。輕則皮外傷，洗吓傷口就走得；重則傷到筋骨，要入院治療之餘，仲要應付之後嘅覆診、物理治療同林林總總嘅檢查。如果冇保險cover，樣樣都係錢，腳傷好返但就轉到荷包重傷喇！
市面上主要有兩種保險產品可以保障呢類因為意外而產生嘅醫療開支：1) 醫療保險；2) 包含醫療保障嘅意外保險。
雖然兩種保險都有機會claim到醫療開支，但兩種保險嘅設計原意係有啲唔同嘅。醫療保險嘅作用係由保險公司分擔受保人因意外事故或疾病引致嘅醫療開支，通常都係實報實銷。而意外保險除咗有機會cover醫療開支，亦能夠為意外身故、因意外而身體傷殘嘅受保人或佢哋嘅家屬，提供一筆過現金補償，減輕佢哋可能面對嘅經濟壓力。
要揀邊樣保險，又或者why not both，就要考慮清楚自己嘅保障需要喇﹗
| 提提你： 意外保險係針對受保人身體受損嘅原因，只賠「突發意外」，唔係所有情況都可以claim！如果你係因病入院就賠唔到喇！ |
買意外保險有咩要留意？
意外保險一般會包含呢三個部分：
- 因意外死亡或傷殘而發放嘅一筆過賠償
- 因意外受傷而返唔到工嘅每週定額津貼
- 因意外引致嘅實報實銷醫療開支，例如跌打、物理治療等等
唔同保險計劃嘅保障範圍都有分別，有啲綜合產品可能包晒三項保障，有啲就可能只包括部分保障，買之前要留意唔同產品嘅保障範圍同賠償上限。
💡 Tips： 受保人嘅年齡同職業都係保險公司評估承保意外保險嘅考慮因素，投保後如果個人狀況有變，例如畢咗業、由學生轉咗做某啲高危工作，記得要通知返保險公司呀！
Claim 保險要點做？
如果真係唔好彩發生意外，要就醫療費用索償，記住响索償期限內，向保險公司交齊文件：
- 由醫生填好嘅索償申請表格
- 收據正本
- 醫療報告，例如化驗、電腦掃描報告
- 醫生轉介信
- 病假紙、出院紙
唔同保險公司對索償文件嘅要求可能有唔同，唔清楚就打去保險公司CS問問啦﹗
意外無預告，準備要做好！
後生仔女跌親、扭親真係好常見，如果意外發生之前無買保險，就要自己拎錢出嚟應付醫療開支。但如果一早買咗意外保險或者醫療保險，想睇私家醫生都唔使咁擔心。記住！唔好等到受傷先後悔，未出事前就評估吓自己嘅傷病風險同荷包應付能力，有需要就買定保險，將個風險轉移畀保險公司啦！
