吳浩康（Deep）《Deep Reborn》演唱會日前完滿結束，演唱會中他唱了二十多首經典歌曲，全場Fans high爆。而演唱會前吳浩康表示感冒未清，趁機會感謝太太這段日子為他負責照顧家庭「因為太太病仲嚴重過我，但佢為咗可以比我提早入住酒店，自己一個人照顧小朋友。頭先仔仔第一次見我駁髮，佢都呆一呆好似唔認得我咁。」
吳浩康台上唔記得多謝老婆：因為個騷嚴重Over run
另外唔少藝人演唱會也會邀請自己的孩子上台做嘉賓，吳浩康坦言這一次沒有預愛兒上台，因擔心被音響嚇親：「因為舞台啲音響都有翻咁上下勁，我又買漏咗耳罩比佢，唯有下一次先。頭先台上冇多謝太太，因為個騷嚴重Over run，如果我要多謝佢，恐怕講到11點都講唔完。」
郭思琳超Sweet：好好享受屬於你的舞台
太太郭思琳事後也在IG寫了一篇長文，網民睇完都話超Sweet：
陪你經歷過低潮失意 更加知道今天一切得來不易 今天的你令我更加欣賞你 不論是你的毅力、心態、做人處事 都有很多值得我學習的地方 開心你成為獨立歌手後這麼快便開演唱會
我知道只要你一上台 你的狀態一定會好起來的 因為你是神眷顧的兒子
尋晚場show超正 不止爆場 而且氣氛好好 全場大合唱感覺一定很爽吧 好好享受屬於你的舞台 我們就從這裡出發 他朝一日紅館見
吳浩康唱一場唔夠喉 望轉大場地再表演
吳浩康亦有邀請地盤工友睇騷，佢仲話班兄弟有點唱，不過就冇實現對方願望：「佢地點唱《到底發生過甚麼事》，如果唱佢地啲心水，就要成Part改歌，會加重隊Band嘅負擔，所以唯有下次先。依家一場就未夠喉，我同主辦傾緊加場定轉場，好似轉場開心啲！紅館唔一定嘅，但下次係更大嘅場地。」
