張文慈（Pinky）日前接受新城廣播漢陽主持的《詩歌有Guide》錄音訪問，節目將於周日(23日)晚上9時至10時，新城知訊台《詩歌有Guide》節目播出。虔誠基督徒的Pinky，在節目中分享多首詩歌，並大談入行前後遇到的各種經歷，當中更有多次驚險場面。
Pinky在入行前曾做過模特兒及特約演員，「即係跑龍套、茄喱啡，當年拍好多卡啦OK，又喺好多電影入面做特約演員，好似《Beyond日記之莫欺少年窮》，講黃貫中抄我牌，仲有《開心鬼放暑假》都有份，但都係一、兩個鏡頭。」及後Pinky赴日本和美國三藩市留學，完成學業後，在1996年參選亞姐而加入演藝圈，當時參演不同劇集《縱橫四海》、《我和殭屍有個約會》系列、《情陷夜中環》等。在電影方面，Pinky首部拍攝的電影《黑獄斷場歌之砌生豬肉中》，與影帝梁朝偉合作，她直言不敢直視對方的眼睛。
除此之外，她亦獲邀到不同地方登台，當中發生過不少驚險事件，「有年生日喺夜場登台，唱唱吓歌老闆推個蛋糕出嚟，全場同我慶祝，握手期間我畀人扯咗落台，當時着咗一條低胸露背裙，一仆向前就跌咗落人海裡面，好多隻手兜住我，托返我上去，你諗下畀幾多人摸過我個身？」漢陽笑回她：「個場面好香艷！」Pinky續說：「我都唔知喊唔喊好，但人哋又唔係特登，只係好羞辱嘅感覺，最後都硬住頭皮唱埋落去，一半驚險又一半開心。」又有一次，Pinky發現被跟蹤，「架車突然打橫阻住我架車，好彩有兩個交通警咁啱坐喺路邊，嗰架車即刻開車走，如果唔係我可能已經畀人捉走咗。」
漢陽追問Pinky的感情事，她指自己的感情生活5隻手指數得清，「入行後都係2、3個，我以前好執着㗎，好介意同好驚畀報紙寫，好驚有唔好影響，但而家咁大個冇乜所謂；信咗主之後，唔會再為拍拖而拍拖，呢個年紀想搵個伴多啲，心態好隨緣。曾經有諗過要小朋友，仲雪咗卵，但都係好多年前，而家都唔怕講，唔可以為咗結婚夾硬搵個人去生，而家已經放棄呢個念頭，一切交畀主，因為上帝早有預備。」
