由T.MAX（海淦清）及JY主持的新城節目《Z世代咪高峰會》，邀請女子組合Beanies成員李凱翹（Kay）和潘釗彤，張進翹（Manson，藝名：MANSONVIBES）和力臻4位新晉歌手，節目中，他們先後介紹自己的新歌，並即場挑戰唱Live，Manson以結他為大家伴奏。
T.MAX表示歌手嘉賓們即場唱Live，是好考唱功，欣賞他們一口答應，勇於接受挑戰。力臻表示第一次在電台節目中唱Live，好好玩；Kay笑指清唱的感覺，就如赤裸裸一樣。
接著，他們研究「MBTI」十六型人格測試，Kay說﹕「我以前都唔覺得自己好理想主義，後來發現我可能有啲嘢求其啲，只係因為唔想輸，或者有藉口，但最近開始涉獵呢個行業，或者真係想做自己想做嘅嘢，我就發現我係好煩，拍MV係咁煩導演，比起平時係煩100倍，同埋成日畀壓力自己，瞓唔到覺。」
Manson亦指自己會自我批判，「我成日都會自我批判，例如彈錯一個音，或者今日冇做應承自己嘅嘢，例如運動呀，所以而家我就會練習，就算做咗幾細嘅事，我都會讚一讚自己，再做下一步，抵抗自我質疑。」
至於是INFJ（倡議者）的力臻，直言對批評十分敏感，「所謂敏感未必係話自己唔鍾意聽，反而係好怕聽完，自己要花幾多心力去耐化嗰啲評語，然後成為自己進步嘅動力，因為呢樣嘢好吃力，要篩選邊啲評語你要聽，邊啲唔使聽，篩選完之後，你當然會唔開心，喺唔開心入面去耐化嗰個情緒，所以呢樣嘢係攰。」
釗彤屬於ENTP（辯論家），她指自己最討厭是重複性的事情，笑說：「做歌手，好開心，因為每日做嘅嘢都唔同，但我寫歌，寫咗一段之後，突然之間我想寫另一隻曲風，所以永遠都寫唔完。
圖片：新城
