歌手譚嘉儀日前到新城廣播接受李有毅（Ben）和兒子李國煒（Benson）主持的《Ben同Benson「Chur」到行》錄音訪問，除了分享當年參加《超級巨星3》的入行經過，更為獨立發展後首支派台歌《告別的平行線》作宣傳。
嘉儀當年在紐西蘭攻讀大學音樂系，二年級時申請了回港交流生計劃，獲學校批准返港一個學期。就在準備回港之際，恰巧遇上《超級巨星3》公開招募，她決定一試。「我喺嗰邊申請，之後收到電視台通知面試日期，但時間同我考試日期相撞，我話唔好意思我嗰日唔得，想問仲有冇第二日。其實都已經打定輸數，咁大間公司點會為咗我改期。」
出乎意料的是，電視台答應第二天進行面試，嘉儀隨即更改機票提早回港。「但好奇妙嘅係，我飛咗嚟香港之後嘅第二日，如果我真係遲咗一日返嚟，我就飛唔到。因為紐西蘭嗰邊有個火山爆發，所有飛機都唔可以飛。」她直言：「所以我真係好感恩，如果真係遲一日，就去唔到面試。」
去年，嘉儀離開效力十四年的舊公司，展開獨立歌手之路。她坦言這個決定與新歌《告別的平行線》有著微妙呼應：「呢首歌係我做獨立歌手之後第一首歌，源自一段真實戀情，兩個人喺一齊嘅時候就好似平行線一樣，各自有自己嘅目標，永遠都去不到一個交叉點。我要留喺香港，佢又要留喺外國生活，最後唔係因為唔愛大家分開咗，好無奈。」嘉儀續說：「其實有啲似離開咗舊公司，我哋都係互相祝福。」
回望入行以來的種種，嘉儀感恩整個過程彷彿有上天帶領：「神好似有時未必喺嗰個時候畀你，但突然間又會做一啲奇蹟畀驚喜我。」她形容從參加比賽、入行、推出代表作《印記》，到如今獨立發展推出新歌，每一步都見證著這些奇蹟。
重溫節目，請於4月18日晚上十一時登入知訊台《Ben同Benson「Chur」到行》：https://www.metroradio.com.hk/MetroInfo/
圖片：新城廣播
