歌手方皓玟（小明）今日到新城廣播接受黎莉主持的《勁爆樂勢力》訪問，是她自本月20日宣布聲帶失聲、取消《方皓玟約你落觀濱演唱會》後，首次公開亮相。小明在訪問中親自拆解「失聲之謎」，並搞笑借用寫給好友馬天佑的新歌自嘲：「我唔會再做傻仔喇！」
被問到失聲原因，小明直言是自己「貪吃」所致：「太多可能原因，主要係因為我食咗榴槤乾，然後上火，跟住就失聲。」她笑言以後不敢再吃：「Sorry man，以後唔會再食呢樣嘢。」被問到是誰「陷害」她？她直言是自己購買：「喺屋企得閒想食就可以食，因為有時榴槤唔當造，就唯有頂住先，我冇諗過一包威力會咁大，但我依家知喇。拒絕，企硬唔take嘢！唔take榴槤！」
小明透露已完全康復，而治療期間則不停喝中藥：「唔停咁飲中藥，一日飲兩次，仲有針灸。」問到兒子可有照顧她？她笑說：「佢唔會照顧我，佢只是話啲中藥好臭。咁佢都係講真話，啲藥真係唔係香嘅，所以佢照顧好自己已經係照顧咗我，佢都算幾乖嘅。」
對於演唱會取消後可會再復辦？小明表示：「會想舉行，但都要安排一啲流程、各方面嘅事情，例如樂手時間、場地個期、導演個期、仲有嘉賓個期，其實要好多人嘅時間夾得到先可以做到一個騷，所以每一個騷都好珍貴，我都好珍惜嘅，所以其實我真係……對唔住。」有指場地可能不利於她，問到會否考慮轉地點？小明表示：「個場地可能利我嘅，不過要先考驗我，想我越戰越勇，可能呢次、下一次、再下一次就會係一個最好嘅表演。」
訪問中她亦宣傳自己的第一百首歌《Buried You（all I ever know）》，她希望藉此將自己所有東西化為零，重新開始，用一個新年的心態去再做二百首、三百首的歌出來，同時用一個最積極、最開放的想法，去做一些更加有創意或好玩的歌分享給大家。
提到早前為馬天祐寫了一首歌《一世人做一次傻仔》，小明分享道：「佢打電話叫我幫佢寫詞，我聽咗首歌後，就覺得寫詞不如我寫歌畀你，我就用咗20幾分鐘寫咗一首詞出嚟，我就同佢講，不如你唔好搵寫詞，我畀你一首歌，因為我覺得呢首歌好適合你，佢（馬天祐）一聽到之後覺得好好聽。」 小明以馬天佑這首新歌作比喻，總結這次失聲風波：「我覺得每個人都一定有傻仔嘅時候，就好似我今次做咗個傻仔，食個榴槤乾，個騷就冇得唱，一世人總有一次做傻仔，但唔會有第二次，我唔會再做傻仔喇！」
