內地茅台價格，唔係，應該係講內地茅台黃牛價格急跌，成為咗內地股民嘅焦點。簡單講，喺內地，你隨便走去商店買一支茅台，好大機會都係假貨，而真貨，往往都係落喺黃牛黨，同埋同官員相熟嘅人手上。
我以前有一個朋友，有份幫茅台做核數，佢送咗一支茅台俾我，話呢支應該一定係真，諒佢唔敢俾假貨佢！呢枝茅台，我宜家仲放喺屋企。咁點解有咁多黃牛黨或者假貨？簡單講，茅台酒，喺內地長年求過於供，而唔知點解，啲酒只係批發到去一小部份人嘅手上，咁一係炒高個價，一係咪假貨囉。
不過5月開始，大家見到茅台嘅黃牛價格突然間下跌，而且跌勢都幾急。首當其衝嘅，當然係貴州茅台嘅A股價格，由五月頭1777元人民幣，跌到今日最低既1511元人民幣，期間九成日子收陰燭。作為A股嘅權重股，當然亦都拖累埋A股嘅走勢，搞到唔少微博大V要出口術，連段永平都出嚟講野。
有啲分析覺得，黃牛價跌，對茅台嘅盈利影響唔大，因為從來黃牛黨賺嘅錢都唔係茅台賺嘅。即係打個比喻，如果Mirror演唱會既黃牛票價格跌，唔會影響到大國文化既收入，係咪先？
但係我既睇法係，如果黃牛價有朝一日，跌穿埋茅台嘅批發價，就會令人憂慮，日後茅台個批發價，仲係咪可以企到呢個位？如果有朝一日，黃牛無利可圖，茅台唔再係一酒難求，咁每年仲係咪賣到咁多支酒？無左一酒難求既羊群心態，長遠對佢既銷量有無影響？睇嚟茅台都係要諗下拓展多啲客群，做多啲類似茅台拿鐵既商品。我自己又唔飲茅台；又唔儲茅台，所以其實我嘅關注點，反而係茅台黃牛價格急跌，對內地消費市道嘅啟示。
呢幾日，茅台價黃牛價急挫，其實亦都同時拖累埋喺香港上市嘅內地消費股，好似隻中國中免（1880）。我記得第一次幫佢出輪，隻股個價仲喺200蚊樓上，宜家得返1/4，五月底嘅時候仲有77蚊，而且季績尚可。但唔夠一個月，股價得返55蚊。而如果大家有留意喺歐洲上市嘅一啲名牌股，如果唔係最高端，好似Gucci母企開雲集團 （KER)，股價年初至今跌左兩成三。但係你睇返內地今日出嘅零售銷售數據，其實又唔係真係咁差（您唔信個數就討論中止）。
我嘅睇法係，內地高端消費，如果唔係涉及送禮，其實仍然有一定嘅需求。（係呀，Gucci 其實比較多中產喜愛，唔算最高端）；而低端消費暫時都係維持到。死嘅，正正係做中產生意既商家，情況同香港一樣，有錢嘅人仍然係好有錢，而中產消費就因為擔心未來經濟前景同減薪，消費向下流；低下階層就繼續維持本身嘅消費。個均富，係宜家環境之下，係Average down 緊。
呢個情況，短期嚟睇，其實都好難有太大改變。不過，有啲中低端消費股，呢排可能係跌多咗。喺消費向下流下，銷售又未必咁差。但係如果隻股本身係做中產生意，你又睇見茅台個黃牛價唔止跌，唔好淨係諗隻茅台抵唔抵買，股市既野，有時係一葉知秋。
【關於 #何啟聰】
自小熱愛投資市場，大學時期獲得多個投資比賽獎項。因緣際會下加入投資銀行從事衍生工具銷售工作及投資者教育工作十九年，曾任職荷蘭銀行、蘇格蘭皇家銀行及瑞信香港董事。由興趣演變成事業，離開崗位後有更多空間分享理財投資看法，歡迎交流。
