歌手冼靖峰及何晉樂為宣傳接下來他們有份演出的暗中作樂音樂會《小王子星球之旅》，近日現身新城知訊台由麥卓華主持的《Sunday好快樂》做嘉賓。
冼靖峰開Live爆《聲夢傳奇》將開拍第三季
近日冼靖峰在IG開Live大爆《聲夢傳奇》即將開拍第三季，二人接受「新城八大家」獨家訪問回應此事，冼靖峰說：「其實大家都知啦，公司準備緊《聲夢傳奇3》。其實我想《聲夢傳奇3》有一個崗位準備畀自己，希望可以同參賽者有一個交流」。
冼靖峰親解「妙音龍子」出處：我覺得幾有趣
另外冼靖峰早前參加《亞洲超星團》奪得第三名，成功加入男團 Loong 9 出道，他的外號叫做「妙音龍子」，冼靖峰亦回應這個稱號的由來：「其實我覺得呢樣嘢幾得意，公司一開始同我講呢個名時候，我即刻去Search呢個名係點嚟，我係咩都搵唔到。其實呢個名係公司改，呢4個字係出自一部劇集，劇嘅角色名再變同音字，咁我覺得幾有趣，佢話每個人都係會有稱號，話覺得呢個名係啱我，咁我就話去啦。我都冇諗太多，所以出到嚟都係名一個，唔會影響我表現。」
Loong9 團名引熱議 冼靖峰認係反向宣傳：大家記得呢個名就得
不過團名 Loong 9 以及各成員「龍」的稱號引起唔少網民開post討論，冼靖峰笑言絕對有留意大家的評論：「有好多好有趣嘅改寫，我覺得呢一啲名其實係反向宣傳，好似志偉哥（曾志偉）咁講，大家記得呢個名就得。我哋9個人其實都有傾過究竟呢個名我哋以後點介紹，需要咩手勢，我哋真係有度過，我哋自己會諗 Loong 9 係英文讀法，中文係會點講呢？」
冼靖峰為招牌手勢煩惱 爆 Loong 9 已錄製團歌
最後冼靖峰表示還未有想好個人的招牌手勢會怎樣做出來，但他透露 Loong 9 已在錄製團歌：「開始錄緊團歌，出咗團歌之後，會表演先見到我哋嘅自我介紹。」
