藝人林韋辰今天（5日）到新城廣播接受李有毅（Ben）與兒子李國煒（Benson）主持的《Ben同Benson『Chur』到行》錄音訪問。林韋辰看見Ben難掩興奮，他表示：「Ben係我貴人，佢係第一個搵我拍廣告嘅！」原來於90年代，Ben邀請過林韋辰拍攝多個樓盤廣告，為他帶來可觀收入，林韋辰笑言：「當年冇餓死都係靠Ben哥。」
近年鮮有公開露面的林韋辰，透露曾遭遇嚴重的健康危機，徹底改變了他的人生觀。他透露：「如果大家有留意我嘅消息，都知道我前陣子嘅坐骨神經有事，其實呢個狀況令我整個人生觀都改變咗，知道健康原來比咩都重要，要放喺最前面。」
林韋辰坦言病情一度非常嚴峻，被迫停工半年：「真係行唔到、企唔到、瞓唔到，坐立不安，食飯都要側住個身先得。」在治療過程中，他試過多種方法：「出事嘅時候直接就送咗入醫院，因為行唔到。啱啱落飛機去到入境處就跪咗喺到，完全郁唔到，後來發現係坐骨神經L4、L5有啲凸出咗。」
他表示很多人都有類似問題，但當時情況特殊：「除非你去做一個好緊急嘅手術，一個好簡單嘅微創手術，但我覺得手術始終都係我最終選擇。我用咗好多其他方法，例如物理治療、中醫、針灸、復位各方面我都有試，但係效果唔算顯著。醫生睇我嘅X光片都話唔算嚴重，但實際嘅情況就好嚴重。」
林韋辰透露，最後是一位貴人介紹了專門為國家運動員治療的體育醫院院長給他，情況才得以逆轉，他感恩地說：「朋友介紹咗我去專門幫國家運動員做治療嘅體育醫院院長幫我治療，三次之後基本上我已經康復。」
談到那段黑暗時期，林韋辰表示當時瘦了15磅：「醫生都勸我，就算你瞓喺到都要食嘢，餵豬咁都要餵肥你，否則冇力就復原唔到。」他解釋消瘦的原因：「其實係好多地方壓住咗，啲血液又唔流通，肌肉會萎縮，人踎低起身都真係腳震。好咗之後你會感覺到，嗰個暖流返咗嚟，即係血液返咗嚟，你會感覺到有啲力量。」
而這次生病也為林韋辰帶來深刻的感悟：「咩都唔重要，你唔需要向任何人交代，任何事都唔係屬於你，只有身體係屬於你，真係要好好管理好佢。如果你想好似我咁，60歲過後仲可以去打高爾夫球，同朋友去玩、食飯、踩單車、做運動，你必須要好好管理自己嘅身體。」
被問到目前的工作狀況，林韋辰透露：「開始復出，電影就少拍啲，主力喺電商平台上工作，國內會多一啲。」他感謝觀眾的關心和支持，表示會珍惜健康，繼續努力。
