現年23歲的洪欣兒子張鎬濂今天（13日）現身新城廣播有限公司接受新城知訊台 台長程凱欣主持的節目《原來生活好快樂》的訪問。
張鎬濂入唔到男團認失望
節目完結後張鎬濂接受新城八大家的訪問，講到他有份參加的選秀節目《亞洲超星團》比賽已圓滿結束，最終張鎬濂未能組男團做偶像出道，張鎬濂認為好可惜並表示傷心：「其實自已都emo（emotional）咗兩，三日，其實琴日都仲emo緊，因為真係差少少就成功入到呢個團，同埋自己都好鍾意唱跳。」
感謝一班Fans支持
雖然未能組男團出道，但也很感謝一班粉絲為他拉票，「我emo嘅一個點係會覺我係咪自己當時未做好，係咪都辜負咗佢哋呢，但之後見面會，佢哋同我講『唔好唔開心啦』，大家都會怪自己。但我會覺得感動之餘同心酸，同埋佢哋真係好辛苦同好感謝佢哋。」
男團LOONG 9引網民熱議 張鎬濂：特別創新
近來全城熱話之一便是《亞洲超星團》組成男團後的團名叫LOONG 9，用廣東話來說便是「龍九」，引來網民熱議。張鎬濂笑言這名字是特別，也明白大家熱議的原因：「我覺得呢個名算特別創新，佢哋用廣東話拼音去拼龍字同9字係好唔同，不過聽落去係有少少尷尬。所以當時即刻同唔識講廣話嘅人講要小心讀呢個名，因為讀錯咗音真係會出事，所以佢哋都好大反應，不過呢個名都幾創新。」
母親洪欣做埋經理人 張鎬濂透露將單飛發展
另外不能組男團的他將會選擇是單飛發展，其後會專注演藝事業。而今天張鎬濂母親洪欣亦以經理人身份陪伴到場，不過就選擇了不接受訪問，張鎬濂笑言本身以為自己一個來做訪問：「其實佢都算半個經理人啦，本身作為阿媽湊仔之外，佢都多咗一個身份經理人湊多一個仔，即係簡單啲嚟講算係兩個仔，但都係同一個仔。」
張鎬濂望將來賺大錢：希望自己賺到錢畀返佢
不過找母親洪欣做經理人有一點好處便是不用給人工，張鎬濂坦言將來賺大錢絕對會報答養育之恩：「希望自己真係唔係得阿媽供養我先，希望佢壓力越來越少，所以我希望自己賺到錢畀返佢唔係得佢畀我。」
