馬德鐘今日（9日）現身新城廣播，接受薛家燕、范振鋒、黃思敏《開心大派對》節目直播訪問，家燕姐見到馬德鐘（Joe）馬上答謝Joe為救命恩人！原來早前家燕姐拉隊到雲頂登台，家燕姐差點在升降台碌落樓梯，幸得馬德鐘及陳展鵬在旁及時英雄救美，才吉人天相避過意外。
家燕姐感激馬德鐘同陳展鵬反應敏捷：依家諗番都好驚
家燕姐在節目猶有餘悸說：「當時我穿著長裙及4吋高跟鞋，升降台有9級樓梯，一時踏空，幾乎差錯腳碌落樓梯，好彩馬德鐘同陳展鵬反應敏捷，及時好大力咁捉實我，依家回想都好驚，全靠有兩位護花使者！」
綵排時，家燕姐見到舞台上的升降台，已經問大會可否不要？但大會回覆專誠為她花了好多錢搭建的，希望她可以好靚咁在升降台升上舞台，家燕姐說：「綵排時，馬德鐘同陳展鵬見到，已問演出時，要唔要傍實我？我仲話不用！原來兩位擔心我有意外，冇話我知，一直守在我旁邊，真的好感激呢兩位救命恩人！」
馬德鐘超暖心行為 送潤喉糖及穀物纖維早餐給家燕姐：初時我都擔心家燕姐唱唔唱到
而在雲頂登台當日，家燕姐感冒未癒聲沙，馬德鐘今日細心帶備了一大袋潤喉糖及穀物纖維早餐送給家燕姐，馬德鐘說：「嗰日家燕姐病到連說話時都走音，初時我同黎耀祥都擔心家燕姐唱唔唱到《禪院鐘聲》？仲諗住傍實家燕姐一齊唱，點知家燕姐十分專業，演出時完全同平時一樣超高水準，十分佩服！」
馬德鐘著Deep V衫成焦點 身形超Fit全靠5年都做呢件事
家燕姐亦大讚當晚馬德鐘所穿的Deep V衣服露胸肌個胸好靚，馬德鐘表示Keep得靚胸肌及線條，全因5年前開始茹素及一直健身：「都有做運動，同埋本身食素，食咗5年幾，開始時好多人話我瘦咗，但Keep住之後平穩就冇問題。」
馬德鐘亦分享開始茹素全靠有家人陪伴：「一家人一齊做，咁樣就會容易搞好多，連工人都食素。首先要改變時要知道人體需要咩營養，可以係咩植物到吸收返。」
部份網民批失準 馬德鐘大方回應：下次就再努力啲
另外在雲頂這次表演時有部份網民睇片，指馬德鐘唱歌有失準情況，他笑言：「我又唔覺，我再三聽返都唔覺，唔緊要啦，佢哋覺得有，下次就再努力啲。」在旁的家燕姐也力撐聽不出馬德鐘有失準的情況！
