參加《全民造星2》奪亞軍入行的MC張天賦，短短幾年已攀上紅館，成為當時得令的一線男歌手，集偶像與實力派於一身。
在加拿大讀至高中畢業的MC，因父親患癌症返港而沒有繼續在加國升學。回港後，熱愛唱歌的MC當上街頭演唱者，當 Busker 的日子有苦有樂，跟常會遇到食環署人員驅趕而要轉場，2018年MC曾接受港台電視部節目訪問，當年只得21歲的他曾對鏡頭表示：「我哋啱啱都先喺旺角俾人趕嚟，咪話我哋嘈得滯呀，經常發生喇。」
當全職Busker不夠維生，MC曾分享他於出道前，為生計而嘗試不同類型工作，如安裝冷氣、餐廳廚房、侍應及電話月費推銷員等等，近月他更將自己入行的經歷放進新歌《懷疑人生》的MV，還原當年這段青蔥的年少歲月。
《懷疑人生》是MC繼《說謊者》後推出的第二首主打歌，由Wilson Chow作曲、林若寧填詞、Nic Tsui和Larry Wong編曲，以及Wilson Chow和Larry Wong監製。新歌內容有別耳熟能詳的情歌，以「人生」作為主題，帶出許多人甚至是MC自己心中「懷疑人生」的想法與無力感。
《懷疑人生》MV還原當年做冷氣技工的經歷，拍攝當日大汗疊細汗，導演覺得還未夠，要靠噴水營造戲劇效果，男主角表示 :「安裝冷氣係我返過嘅其中一份工，工作係比MV入面辛苦好多，多數做唐樓或者House（別墅），要搬嘢洗冷氣及換冷氣，搬搬抬抬之後就會發覺，自己背脊多咗好多傷痕！」
MC張天賦是多功能MC，「除咗做過冷氣啦、做過餐廳啦，亦都做過介紹電話plan，即係街邊拉易拉架然後等人過嚟查詢，我覺得呢份工比MV入面輕鬆，因為一來其實如果搵街邊嘅人，係可以攞到唔同優惠，同埋佢哋之間亦有好多你唔知嘅程序上玩法，所以基本上坐喺度都會有人埋嚟咨詢，就唔使好似MV入面咁sell客，除非你要追quota啦，不過平時都要受風吹雨打；而餐廳就係因為當時喺一間餐廳唱歌，佢同我講唔夠人喎，你會唔會入嚟幫埋手呀？會幫手煮意粉、炸雞翼同炸薯條，夠鐘就出去唱歌，唱完歌就會返番入去幫手煮吓意粉。」
打工捱世界的日子在MV重現，MC坦言最窮時，身家接近清零，「MV入面的MC，好似戶口都有幾千蚊？現實中是剩低雙位數，想撳都撳唔出；當時窮就要識慳，多數買飯團醫肚，連八達通嗰五十蚊，都計到最盡嘟埋出嚟用。」
MC有試過《懷疑人生》？如何面對在谷底的日子？「一定有遇過，你必須要喺實際同埋夢想中揀一項去實現，好難兩全其美。」他笑言自己是一個活在當下的人，「可以喺微細地方搵到快樂，所以即使當時好辛苦，我都覺得開心又或者即使幾辛苦都好，busking之後如果我可以買到我想要嘅咪或者喇叭，有人聽我唱歌就開心。」
圖片：YouTube@MCCheungTinFu、IG@mcheung1201
