《中年好聲音3》登峯之戰落下帷幕，賽果出爐，黃博總分212奪冠，張與辰209分獲得亞軍，以一分之差，劉洋以208分獲得季軍。
奪得冠軍嘅黃博曾在中國傳媒大學的歌唱比賽中獲得亞軍，喺2011年參加過湖南衛視的《快樂女聲》，但最終在西安賽區止步於十強，於是轉做幕後工作，佢亦有為電影作幕後配唱，如迪士尼動畫劇集《Elena》主題曲。今次中年好聲音3攞到冠軍終於追夢成功！
大魔王黃博於決賽第一回合壓軸出場，揀咗《If I Ain’t Got You》作爲「必殺歌」，充滿感情嘅聲綫，再加上無敵技巧，以117分順利晉級到第二回合。
深情演繹完全打動評審，黃博偶像Sally姐姐直接打出20分，大讚黃博將自己人生三十幾年嘅經驗都投入咗喺呢首歌，好有感情。另一評審張智霖亦打出高分20分，評語得兩句：「無話可説」，「黃博，我愛你。」
第二回合，黃博「決勝快歌」帶來《站在高崗上》，「決勝慢歌」《沒有你還是愛你》，以出色的表現保持到最後，以總分212分奪下冠軍。
大熱選手張與辰係第五位出場，揀咗Whitney Houston嘅《One Moment in Time》，一首磅礴又大氣嘅歌，加上華麗服裝和燈光的襯托下，視覺和聽覺令現場觀衆極爲享受，以117分與黃博並列進入第二回合。
評審張佳添對於打分一直都好手緊，但今次：「與辰，你有冇記得我係冇畀過20分你㗎，原來係留畀今晚嘅必殺歌。」Sally姐姐大讚好熱情，直呼真係好感動，仲笑言：「你件衫真係好靚，喺邊做㗎，分享下。」
張與辰喺第二回合「決勝快歌」揀咗《大藝術家》，精彩表演展現不一樣的自己，「決勝慢歌」就唱咗《情人》，真情流露打動每個觀衆和評審，最後以209分奪得亞軍。
「大砲」劉洋喺決賽第一回合第四位出場，佢選擇咗呢首《輸了你贏了世界又如何》，歌聲具有力量，充滿爆發力再融合細膩情感，收放自如，完美展現「大砲」本色。
獲得評審羅志祥大讚，畀出20分，表示太誇張，反問劉洋：「你是專業的歌手嗎？」車婉婉幫劉洋回答：「他是開火鍋店的。」羅志祥即答：「不可能！」海兒笑言，懷疑劉洋係唔係一直冇放晒出嚟，恭喜劉洋喺呢個咁大嘅場地可以釋放晒啲氣場。
去到第二回合，劉洋選擇唱《我恨我癡心》作爲「決勝快歌」，又唱又跳，氣氛火熱，到最後「決勝慢歌」部分，劉洋首度挑戰英文歌曲《Without You》,最後以208分獲得季軍。
圖片：TVB《中年好聲音3》
