受到觀衆期待嘅《中年好聲音3》距離終極決賽之夜仲有兩日，從上週日（5月4日）決出七強后，將於5月11日晚7點45分喺啟德體育園嘅啟德體藝館舉行總決賽以及頒獎典禮，大家又會唔會喺網上為佢哋投票，或者到現場支持自己最心水嘅選手？
當晚舉行嘅登峯之戰將會分為兩個回合，首回合七強參賽者將各自演唱「必殺歌」，除咗4個常規評審，仲邀請張智霖、羅志祥、葉倩文擔任決賽評審。在綜合7位評審評分及「觀眾最愛好聲音」票數後，總評分最高之三位參賽者將晉級第二回合。第二回合，三強將輪流各自演唱「決勝慢歌」及「決勝快歌」，綜合7位評審評分及「誰是冠軍」票數後，得分最高者將獲得《中年好聲音3》冠軍殊榮。
七強選手介紹（根據總累積分數排名由高至低）
之前曾3奪MVP嘅女魔王黃博於決賽第一回合將會演唱《If I ain’t got you》，令評審們一致贊嘆愈來愈有自信，實力十分强勁，攞過超高99分嘅黃博又會唔會攞埋冠軍？
作爲新馬賽區企到最後嘅大熱選手張與辰，作曲填詞編曲，樣樣精通，可謂係「無敵大魔王」，成爲第二個獲得99分嘅選手，仲2度奪得MVP，究竟是否能夠殺出一條血路拿下冠軍？喺決賽第一回合將會演唱《One Moment in Time》。
因爲雄厚低沉、具有爆發力聲音嘅劉洋被評審稱爲「大砲」、「重砲手」。又因爲表演狀態一直穩定表演而被網民稱贊，成爲觀衆十分期待嘅選手之一，喺決賽第一回合佢選擇咗呢首《輸了你贏了世界又如何》。
因小時候發生意外永久失去雙臂嘅李金凱，靠身邊親友同港樂重新振作走出低谷，被大家稱爲「生命鬥士」。從雲南到香港，每次彩排同錄製節目都要跨越1200公里，佢演唱抒情歌每次都會令主持同評審大喊「爆煲」，佢於決賽第一回合演唱《為你我受冷風吹》。
被主持人車婉婉封爲「中3王菀之」嘅陳芷盈擅長用溫柔甜美嘅歌聲打動觀衆評審，現實作爲福音歌手嘅佢，希望通過音樂傳遞情感同希望。曾用一首《領悟》奪得97分，成爲難以令人忽視的黑馬，在當晚決賽表演嘅歌曲係《小天使》。
上週最後一個出場，爆冷殺入決賽，仲奪得MVP嘅趙浚承，作爲前男團成員被網民大讚靚仔，但人氣急速上升后疑似陷入小風波，被外界視爲最强黑馬嘅佢究竟可唔可以衝擊冠軍？趙浚承於決賽第一回合演唱《我》。
作爲七強中唯一一位外國選手，來自英國嘅占士丁丁（Dan James），熱愛香港文化，視香港為屋家，即使粵語好難學，但每次唱粵語歌都令評審同觀衆十分驚喜，於決賽第一回合將會為大家帶嚟經典歌曲《海闊天空》。
總決賽在即，希望每位選手都可以用最好嘅狀態去享受舞臺，勇敢踏過追夢嘅每一步！
圖片：TVB《中年好聲音3》
