近日網上瘋傳港女「北上捉姦」的影片，場面令好多網民大感驚訝，直言「捉姦捉得咁斯文？」。事主霸氣質問兩人，並當場「抄家」，收走兩人的手機及男友的鎖匙，揚言：「以後唔使返嚟喇！」
事主指在事發當天係因爲男友嘅Apple Watch留咗喺屋企，無意中睇到在深圳高級餐廳訂枱的訊息，先知道男友一直偷食。並怒言：「點解一個男人衰起上嚟，可以咁賤格作啲故仔，呃你唔返屋企瞓，原來同另外一個女人上大陸開房食飯，仲要係去啲貴嘅地方。」
影片記錄上年11月捉姦嘅全程，港女與另1友人進入餐廳捉姦，發現一齊13年嘅男友與小三正在甜蜜撐枱腳，港女即時衝上前指責男方「好X開心喎你，係咪啊？」，又指「無諗到我捉到呀？」，男友表情愕然，又質問小三「你知唔知佢有老婆㗎？」，小三露出尷尬神情，眼見遭近距離拍攝，十分尷尬地用手遮面，並向港女表示，「有乜出去講喇」。其後更當場「抄家」，將兩人嘅手機收走。
而港女繼續不斷質問男子「有乜講呀你？」，其對方只是默默承受，沒有作出反抗，低頭唔出聲，要求男子交出電話及鎖匙，「攞返鎖匙電話嚟，你以後唔駛返嚟喇」，港女找到男子的手機並拿走，雖然港女爆粗，但聲浪不算大，亦沒有激烈行動，故捉姦期間餐廳的食客未有受影響，在場繼續用餐。
影片被瘋傳後，引起網民熱論，直指「你都算冷靜㗎喇！正常其他女人已經喺間餐廳大吵大鬧」。不過，都有網民對港女捉姦捉得咁斯文感到驚訝，「捉小三捉到咁斯文，成間餐廳都冇人知，唔夠轟動，下次做好啲啦」。
圖片：Threads截圖
