薛家燕、范振鋒及思敏主持的新城《開心大派對》節目，昨日（8日）邀請了最近在電視螢幕及電影銀幕都不停亮相，從而被喻為「幕霸」的車婉婉 (婉婉)接受訪問。家燕姐與婉婉當年曾在TVB古裝劇《皆大歡喜》合作，家燕姐大讚婉婉在「中年好聲音」擔任主持十分出色，又大讚她執生能力超強，記性又好，每集都追看。
婉婉之所以有機會擔任「中年好聲音」主持，原來TVB高層曾志偉親自邀請她。她表示起初壓力好大，為了在台上與參賽者互動，她將所有壓力都豁出去，每季開始前，她都會落足心機做準備功課，睇晒所有參賽者二百幾條片，又會逐個睇資料，又會提早返錄影廠睇參賽者綵排，並會走到觀眾跟參賽者傾偈，第一集曾試過因為兼顧拍劇，只睡了一小時就趕回錄影廠睇參賽者綵排，以便她更清楚了解流程及參賽者在台上的表演。
她感謝節目監製同曾志偉俾好多空間，去年托「中年好聲音」鴻福舉行了個人演唱會，她坦言曾有段時間因媽媽離世而不開心，心情影響導致失聲唱唔到歌：「嗰時把聲好沙，唔係唔想唱，而係唱唔到，好似漏咗氣咁，冇咗高音同假聲。但隨著心情同身體，慢慢好番。」阿范也表示記得當時見到婉婉唱唔到，他也感到好心嗡。
而今天為3.8婦女節，家燕姐與婉婉絕對是家庭與事業同樣成功的女性典範，婉婉表示無論工作幾忙都好，一定要晨早起身湊囝囝返學，之後再到灣仔街市買餸，再開工拍劇及「中年好聲音」主持。家燕姐亦表示當年自己同樣要兼顧子女及拍戲，同樣一定要先照顧好子女食早餐及上學，女子飯餸才安心去開工。
談到囝囝BBQ車浚義，婉婉指一定要囝囝學好中文及識講廣東話：「懷胎時已同老公講明，囝囝在香港長大唔可以唔識中文， BBQ有時同我講英文，我唔答佢，話佢做咩講英文，你係中國人嚟嘛。」
