去韓國快閃睇Con，被人撞一撞，電話跌落地「啪」一聲，成個Mon爆晒無反應！仲要無back-up過啲相，除咗原地喊出嚟，仲可以點算？
冷靜啲先，無論你部機係無得救要報銷、抑或可以返廠維修，如果你有買旅遊保險，就有機會claim得返啲洗費。所以，爆Mon嗰吓，第一時間係執返部機、影低啲損毀證據，再了解返自己份旅遊保險嘅保障範圍同索償方法，咁就無咁傷啦！
去旅行一定要買旅遊保險？
保險嘅作用係幫你响遇到風險時減低損失，係咪需要買旅遊保險，就要考慮自己係咪可以承受响旅程中遇到不幸事件時帶嚟嘅財務損失，例如好似上面講嘅電話爆Mon，又或者航班延誤而要額外酒店住宿、食錯嘢要入院，甚至遇到嚴重意外而要緊急醫療支援…… 旅行途中遇到呢啲風險，你有冇準備好點應付？
旅遊保險能夠為投保人分擔响旅途中遭遇意外時嘅風險，包括一筆過賠償人身意外傷亡、安排緊急支援、實報實銷醫療開支、提供行程取消或延誤嘅現金津貼，以及賠償財物損失及個人責任等等。
| 提提你： 雖然唔同旅遊保險計劃嘅保障範圍都大同小異，但賠償上限、自付額水平、個別不保事項都有啲唔同。以手提電話保障為例，部分保單會限制受保手提電話嘅數目，又或者只保障屏幕意外破裂嘅維修費用而唔保障遺失手提電話。投保前，應該仔細了解保障內容同不保事項，揀一份符合自己行程同需要嘅產品。 |
幾時買旅遊保險先啱？
有人覺得「出發前有買就得啦」，如果你都係咁諗，你就享受唔到旅遊保險嘅全面保障喇，點解？
假設你一買機票就即刻買旅遊保險，但出發前突如其來有事要取消行程，例如目的地爆發工業行動或者自然災害、又或者近親有事唔可以成行，你就可以claim番因為取消行程而退唔返嘅費用，例如係住宿、交通，甚至活動門票等等。但如果係出事後先買保險，譬如係政府已經對你嘅目的地發出旅遊警示你先買保險，就算你仲未出發，你都唔可以享受到取消行程嘅保障！所以，一confirm行程就要即刻買保險，千祈唔好拖！記住早買早享受呀﹗
Claim保險要點做？
如果唔好彩旅遊期間出事，要記住以下幾點：
- 向相關機構拎定索償所需文件
● 財物失竊：必須响24小時內向當地警方報案，攞齊詳細報案紀錄
● 有病睇醫生：拎定醫生簽發列明診斷結果嘅證明書，同埋收據，如果有任何醫療報告，都要拎埋
● 行程或者行李延誤：搵相關交通機構，例如航空公司，拎返列明延誤原因嘅報告同證明文件，如果因為延誤而訂購咗額外住宿或者機票，都要保留埋收據正本
2. 保留證據
千祈千祈千祈唔好就咁掉咗已損壞嘅財物呀﹗一定要保留相關財物，影埋相留低證據，如果有keep住買嘢時嘅單據，就最好喇！
3. 返到香港即刻報保險公司
● 唔明點claim嘅話，直接打去CS問清楚個索償程序。
● 盡快提交索償申請，向保險公司交齊文件，記得要留意索償期限呀﹗
旅行為happy，唔好為意外埋單
去旅行都係尋開心，唔想因為部電話跌爛咗就影響心情，出發前就記住買好旅遊保險喇﹗最後，記住check清楚保單內容，睇清楚保障範圍，旅行期間save返保單副本同埋保險公司嘅緊急求助電話，咁就算遇到風險都無咁徬徨啦！
(跳起Yeah)
