資深音樂人Johnny Yim（嚴勵行）日前（27日）到新城廣播接受李有毅（Ben）和李國煒（Benson）主持的《Ben同Benson「chur」到行》擔任節目嘉賓，有「編曲俠」之稱的Johnny，曾為張敬軒、關淑怡、蘇永康及林峯等歌手編曲，同時為歌曲及演唱會擔任監製，早年獲邀歌唱選秀節目《聲夢傳奇》擔任音樂總監，為年輕學員創造夢想，不過Johnny的兒時夢想竟然跟音樂無間。
Johnny指小時候家中女性親戚較多，唯一一位男性長輩是他的公公，他指外公當年在英國劍橋工程系碩士畢業，畢業後回到祖國任職軍艦工程師，他表示：「嗰個年代讀書有咁嘅戰績，可以周遊列國，真係我嘅偶像，雖然佢好年輕就過咗身，但成為咗我偶像，唔係我爸爸唔夠厲害，而係我公公太勁，我唔學佢學邊個呢？所以我細個嘅夢想係做工程師。」
至於為何由工程師變成音樂大師，Johnny透露在加拿大讀大學時，發現自己最愛是音樂，而且滿腦子只想著鋼琴，直至2004年奪得《第16屆CASH流行曲創作大賽》成為轉捩點，令他跟音樂結下不解緣。「其實我對音樂嘅熱誠一出世就有，因為我爸爸做音樂嘅，媽媽開舞蹈學校，兩個都從事藝術。」
Johnny憶述入行後首次成功出售歌曲是賣給了郭富城，他表示：「仲要一次過賣兩首，對一個新人嚟講簡直好黐線，佢係四大天王喎，我記得我走入房簽約時笑到合唔埋個口，仲要笑到流口水，後尾我企起身望住個窗，其實係要抹番啲口水。」
