由薛家燕、思敏和范振鋒主持的新城《開心大派對》節目，請來堪輿學家及粵劇編劇李居明錄音訪問，李居明多年來拍攝的《大迷信》電影系列大受歡迎，他透露今年將推出《大迷信2025》電影，將過去12年拍攝的「大迷信」電影再次搬上大銀幕，當中包括中國、日本「問米婆」和美國「問米公」的訪問，還有講述粵劇演出時跟靈界接觸的《粵劇靈》。
范振鋒好奇靈界為何喜歡看粵劇？李居明表示：「當我哋拉二胡時，所有靈界都會受到感染，有啲似呼召靈界嘅一種樂器，好似大酒店破地獄嘅儀式，就係吹住粵劇嘅『啲打』，即係嗩吶，嗰個頻率一吹你就想喊，啲靈體亦會甦醒，所以粵劇除咗人睇，靈體都會睇。」
李居明同時負責經營北角新光戲院，惟這座屹立53載的戲院將於今年3月3日結業，提到這間經典粵劇表演場地，范振鋒自爆一次恐怖經歷：「新光戲院有兩個一大一細嘅劇院，有次我哋去表演，我行錯咗去細劇院，見到入面有個神主牌。」李居明表示：「嗰到係一個荒廢咗嘅化粧間，係閒人免進，仲係最猛，出咗名有好多人陪你化粧，你望住塊鏡，會有人睇住你化粧，所以有啲老倌唔敢落去，我哋就封咗嗰到；有次同賴慰玲拍《粵劇靈》，佢企喺我側邊望住塊鏡，但佢望唔到我。」
李居明又在節目中爆料，指早年在新光戲院上演《蝶海情僧》，甫開場，舞台監督問他是否聽到樓上很嘈吵，直到中場休息有艘船駛出來，卻不受控兼撞冧整個舞台燈光和音響，李居明表示：「我即刻拜神唸經，之後突然有番電，電腦又通番，自此之後，每逢新光無電或者電腦壞咗，佢哋就叫我過去，上完香唸完經又有番電。」
新光戲院即將結業，李居明已安排2月22日舉行一場聚會和法事，藉以超渡和帶引一些靈體去佛堂，李居明稱：「雖然外界覺得係迷信，但係因為你唔了解，如果你了解就知道天外有天，人外有人，另外一個平衡宇宙其實存在嘅。」
家燕姐又提到當年在新光戲院巧遇紅線女，她開心到不得了，原來當日紅線女專程到新光戲院拜訪李居明，李居明表示：「當時我續咗新光戲院嘅約，紅線女落嚟剪綵同唱歌，好多明星名人都有嚟，佢（紅線女）即席揮毫支持我，寫咗新光兩個字，我將原裝字畫送返內地擺喺佢嘅劇院，作為新光一個告別。」
