澳門帶病開騷張天賦兩度向觀眾道歉：「冇盡好歌手職責！」尾場宣佈取消 -

流感盛行，幾乎人人都帶病跨年，MC張天賦亦不例外，唱Live一向有保證他，昨晚（4/1）在澳門的倫敦人綜藝館舉行《This is MC 2 LIVE IN MACAU》演唱會Day4，亦慘被感冒困擾，用盡百二分精神去完成第四場後，最後亦忍痛取消《This is MC 2 LIVE IN MACAU》尾場（5/1）場次。

不幸患上大感冒的MC，昨午綵排時已開始唔妥，流住鼻涕唱歌，上台前需以藥物控制病情。開場後，努力撐住狀態的MC一口氣又唱又跳以《百萬大道》、《Overkill》及《This is MC》為個唱揭開序幕，觀眾還未發現MC抱恙，直到與昔日busking戰友Goo Chan合唱了《這裡等》後，MC以沙啞聲音伴隨鼻音向現場觀眾打招呼時，終難掩身體不適。

MC張天賦說：「先戴定一個頭盔，好抱歉好抱歉，因為我認為自己冇盡好歌手職責，冇好好keep好自己身體，幾個鐘前係超級病，而家我都係好渾渾噩噩，但無論如何都好，會用百二分精神去唱歌俾大家聽，你哋嘅歡呼聲都會幫我嘅喇叭注入呢個嘅能量。」現場觀眾即報以掌聲及大叫加油。

帶病飊高音，MC做得到。即使唱《隔牆有耳》及《夜曲》時有因咳延遲了入歌，緊隨其後的《救命稻草》、《第二人格》及《小心地滑》仍然能保持高水準，直至原定唱《時候不早》落台握手環節，MC再次鄭重向觀眾致歉：「非常之抱歉，今日未必可咁近距離見大家，因為真係非常之犀厲，為了歌迷健康同安全，抱歉我今日落唔到嚟。」感冒在身，無奈要與觀眾保持社交距離。

一直捱到演唱會最後一首歌《世一》，MC鬆一口氣，感謝觀眾包容，他說：「必須再多謝每位入場觀眾！哎！幾辛苦都好，終於捱到呢到！今朝3點幾醒咗，我好耐好耐未試過咁唔舒服，必須再一次提醒大家，小心身體，保重身體！再次多謝每一位入場觀眾嘅支持，令我捱到！呀！原來有嘢唔得都可以變得，多謝你哋！多謝大家畀咗一個世一嘅晚上畀我！」MC幾經辛苦完成第四場演唱會，整個人體力已不支，需要在工作人員攙扶下返回酒店休息。