鄭希怡（Yumiko）近年專心照顧女兒梁子柔（梁浸浸），較少現身公開活動，轉眼梁浸浸已經9歲大，Yumiko即將回歸樂壇，重拾歌手身份，新歌好快有得聽，「今次會挑戰自己嘗試唱Rap。」日前，Yumiko現身新城廣播接受譚玉瑛姐姐、何基佑與麥皓兒的《QK玉瑛室》訪問，分享過去十年緊守媽媽崗位的愉快家庭生活。
「原來足足十年冇嚟過新城，好多回憶……」婚後的Yumiko並不算活躍，她說：「生咗小朋友後，冇再好似以前咁密集式出歌，我好享受照顧照顧小朋友，阿女大得好快。」Yumiko沒有錯過女兒每個成長階段，「由她學講嘢、學行路到入學讀書，每個重要時刻我都在身邊。」浸浸深得父母遺傳，手長腳長又高挑，但在Yumiko的社交平台，甚少看到浸浸穿公主裙，Yumiko跟主持們分享女兒喜好，笑說：「佢唔鍾意扮靚，就算買裙子給她都唔會著，淨係鍾意著T恤短褲。」
疊埋心水照顧屋企，近幾年Yumiko偶有接工作，四年前一個沒有刻意經營的爆發點——憑《乘風破浪的姐姐》在內地冒起，她在節目中盡顯爽直女漢子作風，深得觀眾歡心。「節目播出後，在內地多了一些job，那時正值covid，出入境都要隔離非常不便。我父母一直在上海居住，他們提議我不如搬上去一齊生活，我跟老公商量，如果要去就一家人去，唔可以分開。」生活重心北移，Yumiko第一個考慮的是女兒讀書問題，「當時都有好多取捨，衡量到阿女在香港都返唔到學，不如試下在另一個地方生活；老公都要放低好多嘢，現在回想好易，當時嚟講都係一個唔容易嘅選擇。」
梁浸浸在上海一間國際學校接受教育，此校採多元文化教學模式深受家長歡迎。Yumiko在《QK玉瑛室》訪問中亦提到教育問題，她說：「好彩女兒在上海讀書時有得揀，中文科可自選用繁體字或簡體字學習，當時我為女兒選擇了繁體字，全班得兩個同學選，她是其中一個，其餘都是用簡體上課。阿女都有投訴，經常會問：『點解其他同學寫字筆劃咁少？我要寫咁多筆劃？』我話遲下你就會明白，你學多少少啦！」疫情後Yumiko一家搬回香港，女兒浸浸回歸香港教育制度，無縫接軌，「而家她返來讀書，全部中文字都識，唔使辛苦再學過。」Yumiko用心良苦。
做父母要考牌，Yumiko由新手晉升資深媽媽超額完成了。「呢十年最大改變是性格，以前講嘢好急會容易衝口而出，女兒出世把我訓練得比從前有耐性，明白有些帶傷害性的說話，一旦講出口就收唔返。」百鍊鋼化為繞指柔，梁浸浸長大了，Yumiko同步成長。
圖片：新城
