朱茵和潘燦良（燦哥）今日在新城廣播，接受由譚玉瑛、何基佑（Kay）和黃筠兒主持的《QK玉瑛室》訪問，Kay甫見女神朱茵後，他立即拿出一張朱茵的Yes!Card，向她索取簽名，朱茵見狀驚喜萬分，當她簽名時，Kay儼如一位小fans，面也紅了，他向朱茵說：「呢張係燙金版㗎！」
談及巴黎奧運，兩人表示都有追看，燦哥說：「開始嘅時候，乒乓球、羽毛球睇咗好多，我想睇第二啲嘢，期望有新項目，噚晚睇咗女子滑板，嘩，精彩，佢哋10幾歲，好犀利，我好期待霹靂舞，之前又有個代表盧森堡嘅乒乓球員倪姐姐（乒乓球選手倪夏蓮），佢以前係中國隊，好犀利，我睇到佢好Enjoy做運動，好開心，唔係話攞唔攞獎，運動對佢嚟講，佢好享受，而且佢同老公一齊參與呢個盛事，人生真係好美滿。」朱茵說：「真正運動精神！」
朱茵亦有欣賞奧運賽事，她表示看到老將得獎牌，會替他們感到很高興，「運動員嘅生涯太有限，後生嘅力氣始終比上咗年紀…所謂上咗年紀都只係講緊20歲尾、30歲頭，已經係老將，嗰日我見到祖高域（網球選手）贏，我好感動，因為我睇住佢比起後生仔越嚟越冇氣，但薑越老越辣，佢靠情緒、腦、技術，所以睇住老將攞獎會特別感動！」問到女兒黃鶯有沒有運動細胞？還是遺傳爸爸黃貫中喜歡音樂？朱茵笑說：「阿囡有玩音樂，拉小提琴，但佢最叻係剪片，佢拍一啲佢覺得得意嘅嘢，呢一世真係唔同，不過我同佢講『唔係唔畀你剪，每日出新片都冇問題，但係你都要做下其他嘢，不如我哋去打羽毛球吖！』佢都有應承，樣樣都玩、唔好玩死一樣。」
圖片：新城
