謝雪心(心姐)日前在新城廣播,接受「鬼王」潘紹聰主持的《恐怖熱線》錄音訪問,踏入農曆七月鬼門關大開,心姐在節目中勸喻大家,不要在街上流連、不要嬉水、不要行夜山、不要飲酒,因為酒後會神智不清,就容易遇到「污糟嘢」。潘紹聰亦提醒家長們,燒街衣時不要攜同小朋友前往,他說:「因為唔知佢哋陽氣夠唔夠,同埋唔好踩到衣紙、祭品。」
![娛樂-恐怖熱線-潘紹聰-謝雪心](https://metro.hk/wp-content/uploads/2024/08/3.-謝雪心、潘紹聰3.jpg)
遇過不少靈異事件的心姐,由於因為經常到外地拍戲,所以住過很多酒店,原來她有酒店防鬼必殺技,「喺酒店床邊擺『拖鞋陣』,入房又會敲門,床頭一定會放把較剪,近期有人教去洗手間沖水,但如非必要都唔打開衣櫃門,盡量唔掛衫入去,除非要掛戲服先開。」心姐亦經常獲邀演出盂蘭節的神功戲,她指戲班有不少禁忌要遵守。
眾所周知,心姐年輕時是一名游泳健將,有年她曾代表香港到台灣出賽,竟在酒店遇上恐怖經歷,「當年我哋6個女仔瞓到半夜,有個隊友推醒我話有鬼,佢好驚,要同我孖舖,第二朝我哋好早練完水,練完返酒店補眠,我瞓瞓下有把聲叫我個名,把聲好空洞,我望到一個着黑色長衫好瘦嘅男人,喺好高飄落嚟,我全身郁唔到,叫又叫唔到,掙扎咗好耐終於郁得番,後尾問番半夜叫醒我個隊友,原來佢個經歷同我一模一樣,喺唔同時間見到同一個靈體。」
![娛樂-恐怖熱線-潘紹聰-謝雪心](https://metro.hk/wp-content/uploads/2024/08/4.-謝雪心1.jpg)
心姐提到2004年雅典奧運,她獲安排飛到當地採訪奧運閉幕,當時她入住傳媒村,笑言跟今屆一樣沒有冷氣。她憶述:「第一晚去到,好記得係8月,我11月要喺任姐(任劍輝)忌辰演唱,所以夜晚對住愛琴海練聲,突然感應到好多隻眼望住我,一望過去有好多隻狗望住我,我一個人又好驚,我話我嚟採訪,唔好咬我。第二日做嘢,先知我哋嚟之前,有個韓國傳媒喺個海浸死咗。」潘紹聰即謂,「咁可能啲狗唔係望住你,係望住你後面,你啲歌聲吸引咗佢上嚟!」令人毛骨悚然。
《恐怖熱線》精彩內容,請留意8月10日,晚上11時至凌晨1時正,新城知訊台《恐怖熱線》節目 ,收聽網址:https://shorturl.at/6Sla2
圖片:新城