葉麗儀(Frances)一連兩場《葉麗儀感恩55周年香港演唱會2024》,昨晚已圓滿結束,全場坐無虛席,鄭國江、黎瑞恩、邵美琪、肥媽瑪利亞、黑妹(李麗霞)等捧場外,Frances的家人,亦專誠由澳洲來港欣賞,她在台上感恩有一個幸福家庭。
![娛樂-葉麗儀-感恩演唱會-丈夫](https://metro.hk/wp-content/uploads/2024/08/5.葉麗儀尾場-scaled.jpeg)
![娛樂-葉麗儀-感恩演唱會-丈夫](https://metro.hk/wp-content/uploads/2024/08/11.鄭國江捧場-scaled.jpeg)
![娛樂-葉麗儀-感恩演唱會-丈夫](https://metro.hk/wp-content/uploads/2024/08/10.音樂總監倫永亮-scaled.jpeg)
是次演唱會以「感恩」為主題,Frances感謝觀眾們陪伴她走過音樂旅程,她說:「我心中無限感恩,最先是感謝天主安排我生於葉家。」Frances的父母生於大家庭,公公有7位太太,24個子女,Frances說:「我媽咪排第9,叫9姑娘。我阿爺第一個老婆生咗8個女,喺佢60歲嘅時候老婆過身,娶咗第二個老婆生多7個;我爸爸出世嘅時候,我阿爺係80歲,仲有個細佬係82歲先至生。」她指父母在戰時相遇,成家後決定兩個就「夠晒數」,於是生了兩個兒子,但小兒子在11個月大時因病過世,幾年後決定多生一個小朋友,Frances說:「嗰個就係我喇,真係好好彩,如果唔係我唔會喺度。」她指爸爸對她很痛鍚。
![娛樂-葉麗儀-感恩演唱會-丈夫](https://metro.hk/wp-content/uploads/2024/08/9.葉麗儀尾場-scaled.jpg)
![娛樂-葉麗儀-感恩演唱會-丈夫](https://metro.hk/wp-content/uploads/2024/08/2.葉麗儀與老公David2-scaled.jpeg)
![娛樂-葉麗儀-感恩演唱會-丈夫](https://metro.hk/wp-content/uploads/2024/08/1.葉麗儀鍚鍚老公David1-scaled.jpeg)
及後,Frances走到台下親吻丈夫David,坦言很感謝對方51年的陪伴及支持,搞到David感動到眼濕濕,她一臉幸福地說:「喺我生命之中,家庭係最重要,我60歲做祖母,我孫女出世20分鐘我就抱住佢,佢第一次沖涼都係我,跟住佢行每一步,講第一句說話,第一日返學我都有經歷到,我係好幸福。眨下眼佢咁高咁大個,仲開始學車,可以做我司機;細孫仔而家都14歲,雖然佢個腦受過創,要坐輪椅同唔識講嘢,但佢係非常開心嘅細路仔,最重要係有好鍚佢嘅家人。」Frances又大讚新抱是個很好的媽媽。
![娛樂-葉麗儀-感恩演唱會-丈夫](https://metro.hk/wp-content/uploads/2024/08/4.葉麗儀尾場-scaled.jpg)
語畢,Frances慨嘆時間過得太快,看著孫女出世,轉眼已經16歲,長得高過自己,她以國語感觸地說了一句:「時間都去哪兒了!」隨後就唱出《時間都去哪兒了》,熒幕上播出她與家人、兒子、孫女孫仔的童年照片,氣氛感人,不少觀眾都聽得眼濕濕。
在安歌環節,Frances唱出新歌《感恩》,第二度安歌就唱出首本名曲《上海灘》,Frances表示很開心,跟四面觀眾拍照留念,她說:「很開心大家今晚反應咁熱烈,我遇到一班識欣賞的觀眾,係我福氣。」最後以一曲《願》祝福歌聲下完美落幕!
圖片:大會提供