黎瑞恩（小恩子）今日現身新城廣播，接受由譚玉瑛、何基佑和麥皓兒主持的《QK玉瑛室》訪問。原來譚玉瑛和小恩子均是藝人高爾夫球協會成員，除了打波外，閒時都會做慈善公益活動，幫助有需要的人。
小恩子認為做藝人的，都要有社會責任，「有能力都會做下，唔一定出錢，出力都得㗎嘛！本身我信主，最近聽多咗佛偈，發覺有啲嘢都幾啱，乜都信下，最緊要心正。」譚玉瑛憶述一件與小恩子初相識的經過，她說：「話說我喺一間酒店，我同男朋友食飯，你同當時嘅男朋友食飯，我就飲緊一支紅酒，突然間侍應埋嚟，話『黎小姐請你飲！』，當時我舉起個杯多謝你，我心諗，你咁得意，我同你都唔熟，但你咁好人，畀多支酒我飲。」小恩子忍不住笑說：「一睇就知你係酒仙啦！」
對別人好，小恩子從來不望有任何滿足感，「我見到人哋開心，我咪開心。」何基佑指娛樂圈競爭大，心態有沒有改變過？小恩子說：「我自己都唔知，對人好係應該，但有時都會踩雷，對人好，人哋未必鍾意，人哋會諗『做咩啫？你想點啫？』。」
經常保持開心，病痛都會離遠自己一點，小恩子說：「成日有好多鬱結、唔開心，身體會唔係幾好，如果身體麻麻地，應該開心啲曬下太陽。之前我都試過唔舒服，胰臟生咗兩個瘤，我唔理，話之佢，我唔Check，又冇睇醫生，每個人都會行去最終嘅目的地，就咁樣過咗8年；有一日肚痛，應該差唔多要bye bye，點知醫生話係腸胃炎，橫掂入咗嚟，Check埋胰臟兩個瘤，點知醫生話見唔到我有瘤，只係見到有兩撻疤，可能嗰段時間我開心咗先，食咗先，玩咗先；當時我可以合格去買番份保險，我就知道自己完全冇事，我就好開心，係我50歲嘅時候，一份好大嘅生日禮物。」
