有「鬼后」之稱的關寶慧（Emily）早前在新城接受潘紹聰主持的《恐怖熱線》訪問，天生有陰陽眼的Emily，經常遇到鬼怪事。在Emily 18歲的那一年，在泰國曼谷某酒店內，首次見到靈體，「當晚3個女仔一間房，本來約好另外2個朋友瞓覺前玩一陣啤牌，開始嘅時候，我就去廁所，幾分鐘後出嚟，發現2個朋友已經瞓著，咁我就上床準備瞓啦，我一瞓落床就郁唔到，眼尾見到隔籬床頭有個著白色袍嘅女人，坐喺我朋友枕頭旁邊，真係勁驚，我全程都郁唔到，過咗至少10分鐘先至郁得番。」
因為經常見到靈體，Emily決定向師傅求助，為她「封眼」，但數年後，她卡拉OK消遣時，與玄學家司徒法正齊齊看到靈體，「嗰間卡拉OK房我已經去過好多次，突然間喺飛鏢位有個頭飛出嚟，師傅都見到，係一個好老嘅阿伯，好瘦、好猙獰。」及後，司徒法正接受潘紹聰電話訪問，他憶述有年與Emily到曼谷拍攝節目時遇到的靈異事件，他說：「Emily原本住尾房，我間房就對正電梯，後尾佢同我調咗房，第二朝起身我張床多咗8個枕頭，第二晚瞓瞓吓就喺我旁邊跳，跳足幾晚，我係師傅，又唔能夠換房。」雖然Emily跟師傅換了房，但仍然難逃一見，她表示：「我用門咭開門嘅時候，突然右手邊有團綠色光，見到一個同我一模一樣嘅人，嚇到我腳都軟。」
又有一次，Emily與海俊傑到馬來西亞工作，在凌晨時分洗澡，但聽到一把男人歌聲，她以為是住在隔籬房的海俊傑，於是致房間電話給對方，不過對方的回覆是「我瞓覺緊」，當時十分驚慌的Emily，只好立刻衝上床，「一上床就聽到男男女女幾廿種方言，嘈到好似街市咁，之後念經、講晒粗口都唔掂，搞到我四點幾，但我五點就要起身開工。」近年，她參演舞台劇時，被一件事嚇怕了，她指當日在化妝間化妝，頭頂突然溪錢跌下，現場所有人都被嚇呆，後來有人安慰她只是道具而已！
至於住所方面，亦都有怪事發生，Emily說：「我呢間屋住咗十幾年，一直都冇嘢，半年前一晚我痛醒咗，有嘢咬我手臂，係一個50年代打扮嘅男人，梳住個飛機頭，着白恤衫西褲，我見到佢咬我左邊手臂，成件事好似發夢，但又好真實，後尾我問個相熟師傅，佢話係我以前啲冤親債主，唔抵得我今世唔使做，所以咬我，但其實我只係懶，唔係唔使做，太誤會我喇！」
