21世紀社會變化萬千，在充滿挑戰與競爭的環境下，孩子需要有更「強大的心臟」應對一切未知。從事教育界的兩位名校校長 — 香港直接資助學校議會主席兼英華書院校長陳狄安 及 匯基書院(東九龍)校長鄭建德博士，既是一校之長也是孩子爸爸。卸下校長身份回到家裡，原來他們也各具一本「21世紀父親手冊」，對育兒各有堅持與想法。
讓孩子自由地發展屬於自己的信仰
無論是「慈父」或「嚴父」，難不免會遇上與孩子出現磨擦的時候，兩位擁有宗教信仰的校長當然也不例外。從小開始便對信仰深受不疑的鄭博士擁有兩名兒子，他直言希望孩子與自己一樣能夠追隨上帝，承認過程中曾遇上不少挑戰：「佢哋都會經歷成長期，會產生對信仰嘅懷疑，都有唔想返教會嘅時候，我覺得冇得逼，孩子要自己尋找信仰。所以當佢哋唔願意返教會時，作為父親都只能喺背後默默守望。」
擁有3名女兒的陳主席對此則有另一番睇法，他主張讓孩子親身感受，讓她們用自己的方式了解各種事物：「我會畀佢哋自己去了解，畀佢哋自己接觸，帶佢哋返教會，等佢哋感受一下，問多啲問題。」「有好多唔同嘅方法，最終都係希望可以讓孩子認同我哋嘅信念。」在一個巨大的價值信仰面前，兩位父親選擇用愛與包容，讓孩子自由探索，不刻意不強求。陳主席：「我哋只可以為孩子播下種子，盡力為佢哋淋水施肥，但最後是否能夠發芽並茁壯成長，就係主嘅安排。」
陳狄安校長 : 為人態度比成績緊要 最重要係唔好Hea
21世紀教育界大力宣揚「正向教育」，強調 「溫柔而堅定」的教養法，不過父母也是人，同樣會有負面情緒，當孩子「唔聽話」時，一樣會感到憤怒及失落，這時候考驗的便是父母的耐心與智慧。陳主席：「讀書叻唔叻我唔特別強求，但態度最緊要，如果盡咗力唔得我唔會怪佢哋，但最緊要唔好Hea同唔專注…另外仲有待人處事嘅態度，我都睇得比較嚴謹。」陳主席透露會因孩子犯錯而取消一些已安排好的活動：「孩子做錯都要接受後果，可能個後果對佢嚟講係Harsh啲…但即使基督教講『愛』，都有啲叫Tough Love，唔係叫我哋不斷包容，盲目包容最後就會變成包庇。」「最緊要係訓輔，訓導與輔導，無論做父母或老師，都有呢個職份。」
鄭建德校長 : 冇祈禱包底唔會瞓得好
同樣為人父親的鄭博士，當然也遇過與孩子爭持的情況：「返到屋企我都係一個好普通嘅父親，都有按耐不住嘅時候。」「因為個仔係自己親生，對佢會更肉緊更高要求，而且每日相對，見到佢嘅缺失自然比學生多。」當與孩子發生衝突，他有一招「必勝法寶」：「爭持一輪後用祈禱包返個底好重要，冇祈禱包底唔會瞓得好。」他解釋當大家冷靜後，能夠一起祈禱即表示彼此都願意將心結放低，對他而言這是維繫親子關係一種非常有效的方法。
21世紀父親法則 : 珍惜相處時間 多鼓勵、多包容、多陪伴
21世紀孩子在變幻莫測的環境下長大，作為父母同樣需要跟上時代步伐，調整育兒心態。陳主席與鄭校長從事教育多年，天天面對不同的年青人，有着與21世紀年輕人相處的心法，陳主席：「好多嘢都好短暫，孩子做得唔理想，其實過一兩日再回望，都係小事一宗。珍惜多啲時間，畀多啲鼓勵同包容，就係呢個時代爸爸要做嘅嘢。」鄭博士亦有另一番寄予：「現代孩子有好多諗法，同我哋諗法有好多唔同，（父母）不必將自己嗰套套落孩子身上。孩子迷惘時，陪伴比要求或指導更重要，點樣喺佢哋跌嗰下扶佢一把，為佢拍拍身上灰塵，然後又放佢再向前走，都係21世紀父母同年輕人相處嘅方式。」
相片由鄭校長與陳校長提供
撰文 : 謝明蕙
責任編輯：侯聖樺
