舞台劇演員焦媛日前在新城廣播接受由譚玉瑛、何基佑及黃筠兒主持的《QK玉瑛室》訪問，焦媛透露7月底將演出一個鄧麗君音樂劇，在兩個半小時，她與9位男女演員，獻唱27首鄧麗君的經典歌曲。
在這個音樂劇中，將會講述10多歲的鄧麗君，至到42歲離開大家的心路歷程，包括藝術和感情，橫跨三個大階段，焦媛會演繹10多歲的鄧麗君，她說：「假髮已經有好多個，又要轉妝，仲有好多歌要唱，所以真係幾好玩。」
焦媛坦言跟鄧麗君有一種情義結，每次聽到對方的歌，都會想起一個人，「我唔係嗰個年代，但我爸爸好鍾意鄧麗君，由細到大成日聽佢啲歌，諗起佢又會諗起我爸爸，中學時有歌唱比賽，我參加咗5年，年年都係唱鄧麗君嘅歌，攞咗4年獎，最尾嗰年冇唱佢嘅歌就輸咗。」
在焦媛眼中，鄧麗君是個很特別的女人，「佢嘅歌聲好柔美，性格係外柔內剛，聽返前輩講佢嘅故事，佢係一個好有主見嘅女人，雖然佢外柔內剛，但佢剛得嚟好有情感，特別係對人，以人為本，呢樣嘢係好感動，所以就決定做一個鄧麗君音樂劇。」
