無綫《東張西望》主持吳幸美（Amy）日前在新城，接受由漢陽主持的《詩歌有Guide》的訪問。出身於小康之家的Amy，是家中獨女，父母對她管教甚嚴，讀書時期規定她要傍晚6時前回家；而Amy小時候甚有藝術造詣，除了參加繪畫比賽外，還有書法、話劇和朗誦比賽，並且獲獎無數，她笑說：「我讀書一般，但收埋好多把刀，周身刀！」
節目中，Amy分享詩歌《主你慈愛何等寶貴》，因為這首歌對她來說，意義極大，「爸爸媽媽都係基督家庭長大，爸爸一直有返教會，但未洗禮，到佢差唔多離開上天堂嘅時候，佢有臨終洗禮，之後我同媽媽都相繼跟佢信主。」在爸爸入院期間，Amy經常播這首詩歌給他聽，卻竟然舒緩了他的痛楚，Amy哽咽地說：「神好偉大，令到爸爸一路聽詩歌嘅時候好舒服，舒緩咗佢嘅疾病，我每次聽到呢隻歌，都會諗番起同爸爸呢段時間，係好難過，但又係人生一個經歷，所以一聽到呢隻歌就會有啲感觸。」
得知爸爸患病的時候，Amy簡直晴天霹靂，當時每日又要為《東張西望》開工和拍攝另一節目，忙得不可開交，「我媽咪年紀大，佢未必知道情況係點樣，得我一個去解決問題，例如點樣醫治、需唔需要做手術，壓力非常之大，嗰段時間個人情緒好緊張，係人生裡面最難捱，做呢行當然唔可以對住人哋哭哭啼啼，永遠要笑臉迎人，但當時屋企情況，我其實好辛苦、好難過。」
在這段日子，吳幸美惟有祈禱與神傾訴，「我同神祈禱，我話『神呀，我爸爸喺醫院，情況亦唔樂觀，我唔知邊一刻佢會突然走，求你畀我同媽咪可以陪住佢，拖住佢隻手送佢上天堂』；我爸爸走嗰日，我同媽媽去探佢，探完佢諗住去食嘢散吓心，本來陽光普照，一行出醫院就傾盆大雨，之後收到醫院電話話爸爸情況唔樂觀，我同媽咪上到去嘅時候，院牧已經企咗喺爸爸身邊，我睇住爸爸嘅心跳機慢慢跌到零，知道佢走咗，我同媽咪一人一邊拖住爸爸隻手，同佢講『阿爸你走啦，你上天堂，唔需要擔心，我哋天家再見。』。
漢陽指有信仰是一件很感恩的事，因他的父母離世時，自己亦有拖住他們的手，「等到佢最後一秒，我覺得係好圓滿，我將來都希望係咁樣齊齊整整，係人都要走，我哋喺地球只係過客，當然會唔開心，但有信仰嘅話，知道走咗會去邊，將來又會再見返，會釋懷到。
圖片：新城
