方皓玟（小明）和吳保錡今日在新城宣傳合唱歌《人間垃圾》，先後接受由新城廣播創作總監葉文輝主持的《梨事會》、昆頓主持的《說故事的人》、新城知訊台台長程凱欣和麥卓華主持的《原來生活好快樂》、T.MAX（海淦清）主持的《得閒high tea》、黎莉主持的《勁爆樂勢力》訪問，而新城廣播總經理（節目規劃及頻道運作）朱子昭特別到場為小明和保錡打氣。
之後，小明和保錡接受《新城八大家》訪問，小明在2011年曾推出過《To Haters》，《人間垃圾》算是一個延續，「社會氣氛唔係太好嘅時候，好多人都鍾意放負、批評人哋，其實批評人哋好容易，做好自己係好難，點樣可以從批評人哋轉移視線去自己身上，改變自己嘅思想，做好自己，首先你話人嘅時候，諗吓自己做得好唔好先，就係呢首歌嘅中心思想。」
今次為何請來保錡一起合唱？小明說：「我覺得保錡有好多人生嘅經歷同呢首歌係不謀而合，佢有好多支持者，亦有好多人抨擊佢，所以佢可以將一啲人對佢垃圾嘅諗法唱出嚟，係有另一番見解，所以我覺得搵佢合唱會好適合。」
一年前，小明邀請了ERROR擔任演唱會嘉賓，今次再度被邀合作，第一個的感覺如何？保錡笑說：「夢想成真，我細個聽佢啲歌大，19、20歲開始參加唱歌比賽，不停聽到參賽者唱小明啲歌，每次聽到都覺得唔好聽，只有小明唱出味道，原來做歌手係要唱自己嘅感覺，而唔係抄人哋，今次可以唱到佢嘅歌，係人生嘅一次突破。」
踏入錄音室，唱出每一個字時，會否被掀動起情緒？保錡說：「都有感情喺入面，因為唱歌最重要有感情，將自己內心嘅感覺直線唱出嚟。」小明指保錡唱功好有自己的風格，「辨識度好高，佢一開口你就會認得，呢樣嘢係好難做到，但佢做到，我哋錄嘅時候，只係細執佢一啲位，大部份佢都做足功課。（保錡進步好大？）佢成個人嘅修為，做咗運動之後，思想又正面，做嘢好專注，直頭改變咗佢嘅人生。」保錡認為工作時的確要專注，不能得過且過。提到很多網民讚保錡有種脫胎換骨的感覺，保錡謙虛地說：「稱讚嘅說話就唔好多聽，因為今日讚你，聽日可以鬧你，最重要係清楚自己做緊乜。」
如遇到網上抨擊，他們又怎樣為自己清理負能量？保錡當然選擇跑步，小明亦說：「我每個禮拜都會做三日運動，同埋我裝咗內置Filter，人哋講嘢我會過濾，啱聽又可取咪改變吓，但惡意抨擊就唔使理，如果真係畀對方影響到就去做運動，因為我覺得運動同充足睡眠係好大幫助。」保錡認同：「夠瞓自然EQ好，唔夠瞓就EQ唔好，IQ低。」小明指做運動的確有很多好處，除了皮膚靚、狀態好之外，人都會更精神、積極、有健康的思想。保錡接著說：「我鍾意跑步，接觸咗馬拉松之後，改變咗我9成嘅生活習慣，我而家係零應酬，希望新一代藝人全部都做運動。（有冇呼籲佢哋？）我有呀，已經盡力呼籲，我同大家講一係唔做，一係認真做，但唔係每個人都接受到極端嘅琢磨，咁會容易斷刀，有啲人要慢慢開始。」
